Parliament-ah eptute thu pawimawh sawi phalsak lo : Rahul Gandhi

Congress party hruaitu Rahul Gandhi chuan BJP kaihhruai sorkar laipui chuan Parliament-ah eptu party member-ten ram tana thil pawimawh tak tak - thil man sang, loneitute thil phut leh Pegasus chungchang an sawi a phalsak lo tih a sawi.

Rahul Gandhi chuan sorkar laipui chu eptuten an thil sawi duhte chu sawi tir a, Parliament hun khawhral mai mai turin a ti.

Parliament monsoon sesseion neih mekah Congress party hian spyware Pegasus te, farm law thar pathum sut tura an ngen chungchangate sawiho an phut a ni. "Kan democracy lungphum chu Parliament member-ten mipuite aiawhtu an nih anga an aw an chhuah a, ram tana thil pawimawhte sawiho a ni. Mahse Modi kaihhruai sorkar chuan eptute sawi a phalsak lo a ni. Parliament hun hi khawhral loin, an thil sawi duhte hi sawi tir rawh se," tiin Gandhi chuan a sawi.

Pegasus spyware hmanga phone enthlak sak zingah India mi eng emaw zat an tel nia sawi a ni, Rahul Gandhi phone pawh a tel. Congress party chuan Parliament-ah hemi chungchang hi sawiho an phut a, mahse sorkar lamin a remtih loh avangin eptute hi House-ah aubuaiin, rorel thei loin ṭum eng emaw zat inkhawm tihtawp lailawk a lo ni tawh a ni.