Hri leng thawh hnihnaah ram 52 chuangin India ṭanpuina pe

India rama Covid-19 hri leng thawh hnihna a thlen chhungin ram 52 chuangin hri kai enkawlna tur damdawi leh hmanruate pein an pui tih sorkar laipui chuan a sawi.

Ningania Rajya Sabha inkhawmah minister of state for external affairs V Muralledharan chuan ziaka zawhna a chhannaah he thu hi tarlangin, hri leng thawh hnihna na tak a thlen avangin ram tam takin kawng hrang hrangin India an pui a, India rama hmuh mai tur awm lo hmanrua leh mamawhte an rawn pe tih a sawi. "Ram 52 chuang aṭangin thilpek kan dawng. Sorkarin sorkar hnen veka a pek te, private-in sorkar tana a rawn pek te, private-in private tan veka pekte leh Indian community association leh company pekte an ni," a ti.

Union minister chuan ram dang aṭanga thilpek dawnte hi Inter-Ministerial Committee kaltlanga tihfel vek a ni tih sawiin, he Committee-ah hian Ministry of Health, Ministry of External Affairs (MEA), Niti Aayog, Department for Promotion of Industry and Internal Trade (DPIIT), Ministry of Home Affairs (MHA), Ministry of Health and Family Welfare (MoHFW) aiawhte an tel.

Kar thum hnua hri kai thar tam ber ni thleng leh
India ramah Ningani khan hri kai thar mi 44,230 awm lehin, hei hi kar thum dawn hnua ni khata hri kai an tam ber ṭum a ni leh. Hemi ni vek hian hri vanga thi mi 555 an awm bawk.

Ram puma hri kai mek, active case 4,05,155 zinga 37% chu Kerala state ami an ni. Kerala-ah hian hri kai hi an pun chak leh avangin sorkar laipui pawhin an state-a hri leng dinhmun enfiah a, sorkar hmalakna enpui turin centre team pawh a tir tawh bawk.

Vaccine semchhuahnaah CII leh Serum Institute thawkdun dawn
Confederation of Indian Industry (CII) chuan rural area-a Covid-19 vaccine semchhuah hna chak zawka kalpui turin Serum Institute of India (SII) a thawhpui dawn.

CII president TV Narendran chuan vaccine la thei chinin an la ṭhat dan azirin economic activity pawh a pangngai chho leh thei dawn a ni tiin, hei vang hian CII chuan chak leh zau zawka vaccine semchhuah a nih theihna atan pawl, hospital leh coporate-te chu thawhpui an tum tih a sawi. Serum Institute CEO Adar Poonawalla pawhin CII nena an thawkdun tur chu lawmawm a tih thu sawiin, hmun kilkhawr zawka chengte hnenah chak zawkin vaccine pek hna pawh kalpui theih a nih ngei a beisei thu a sawi.