Sorkarin Covid vaccine dose vbc 100 chuang order tawh

Sorkar laipuii chuan mipuite hnena a thlawna semchhuah turin Covid vaccine dose vaibelchhe 100 vel a chah tawh. Vaccine a order zinga hmun thuma ṭhena hmun hnih chu kar hnih liam ta chhunga a order a ni.

Union health ministry-in Rajya Sabha-a zawhna a chhannaah hei hi tarlangin, sorkarin vaccine a order, dose vab 100.6 aṭanga dose vbc 66 chu July 16 bika a order a ni tih a sawi.

Junior health minister, Bharati Pravin Pawar-a'n Congress MP Kapil Sibal-a'n Covid vaccine siamchhuaktu te hnen aṭanga sorkarin a order zat a zawhna hi chhangin, data-ah hian Covax kaltlanga India-in vaccine a dawn te, state sorkar leh private hospital-ten vaccine siamtute hnen aṭanga an hran a lo order-te chu telh a ni lo tih a sawi a ni.

Kumin March 12 thleng khan sorkar laipui hian vaccine hi dose vaibelchhe 18.6 chiah a order a, May 5 khan dose vbc 16 chah belhin, May thla tawpah Covishield dose vbc 26.6 leh Covaxin dose vbc riat a chah leh a ni.

Rampawn aṭanga vaccine siamchhuaktute hnen aṭanga an chah tawh zat chungchanga zawhna chhangin minister chuan sorkarin rampawn aṭanga Covid vaccine lakluh chungchanga harsatna awm theite buaipui turin team a din thu leh, heng team-te hian rampawna vaccine siamtute chu inbiakna an la neihpui mek zel tih a sawi.