India-ah Covid-19 kai thar 41,831 awm belh leh Ni 5 chhung hri kai 40,000 chuang awm ziah

India ramah Inrinni liam ta khan Covid-19 kai thar 41,831 an awm belh leh a, hri vanga thi 541 an awm belh leh bawk tih Union Health Ministry chuan a puang.

Ni nga chhung chu a zawnin hri kai 40,000 chuang an awm chho leh tawh a ni.

Kerala chu hri kai thar tamna ber state ni chhunzawm zelin, Inrinni hri kai thar chu mi 20,624 an tling.

Ram pumah hri kai mek, active case pawh ni nga chhung a zawnin a sang tawh a ni. Inrinni khan hri kai mek 4,10,952 awmin, hri kai tawh aṭanga 1.30% an ni. Hri kai tawh zinga nuai 1.65% te hi Kerala aṭanga hmuhchhuah te an ni.

Ramchhungah coronavirus kai 3,16,55,824 hmuh chhuah tawh niin, thihpui 4,24,351 an awm tawh. Inrinni-a thi 541 zinga 231 chu Maharashtra leh mi 80 te hi Kerala ami te an ni. Inrinni thleng khan dama chhuahtir 3,08,20,521 an awm tawh bawk.

Nitin hri kai zat, daily positivity rate chu 2.34% a ni mek a, kartina hri kai zat, weekly positivity rate chu 2.42% a ni mek bawk tih health ministry data chuan a tarlang.

Health ministry chuan ramchhungah vaccine dose 47,02,98,596 semchhuah a ni tawh tih sawiin, Inrinni bik khan dose 60,15,842 sem a ni, a ti.