Parliament-ah kar hnih chhungin Darkar 107 aṭangin darkar 18 chiah hna thawk

Parliament monsoon session neih mekah member-te in aubuai avangin hun tam zawk chu rorel theih loin khawhral a ni.

Kar hnih liam ta chhunga Parliament in hniha hnathawh hun chhung, darkar 107 aṭangin 85% chu rorel thei loin a lo thlawna khawhral a ni. Eptuten Pegasus spyware chungchanga sorkar an puhna leh sawiho phuta an aubuai avangin darkar 89 chu khawhral a ni a, darkar 18 chiah rorelna atan an hmang thei a ni.

Sorkar thuchhuak chuan rorel thei lo hun tam tak khawhralna avang hian cheng vaibelchhe 133 chuang hloh a ni tih a sawi.

July 19 aṭanga Parliament monsoon session neih mekah Lok Sabha-ah chuan rorelna hun darkar 54 aṭangin darkar sarih vel chiah hna thawk theiin an awm a, Rajya Sabha-ah pawh darkar 53 aṭangin darkar 11 chu rorelna hun atan an hmang thei a ni.

Eptu party-te chuan sorkar laipuiin Pegasus chungchang sawiho tura an phutna a remtih chuan House chhungah rorelna tluanga taka a kal an phalsak dawn tih an sawi a, mahse sorkar lamin Pegasus chu rinthu thil mai leh buaipui tham a ni lo a, Covid-19 buaina sawiho chu a pawimawh zawk a ti thung. Parliamentary affairs minister Prahlad Joshi pawhin opposition party-te chuan Pegasus chungchanga an thu hriat duh zawngte chu IT minister Ashwini Vaishnaw hnen aṭangin an hriatchian zawk theih tur thu a sawi.

Lok Sabha hian tun thlengin bill panga an pass tawh a, heng bill pass tur hian minute 44 chiah hun an hmang. Rajya Sabha-in bill pathum pass tawhin, heng bill pathumte pass turin darkar khat chuang hret hun an hmang bawk.