India-ah Covid kai thar 30,549 awm belh Pathianni aiin 24% in hmuchhuah an tlem

India ramah Thawhṭanni khan Covid kai thar 30,549 awm belhin, hri vanga thi 422 an awm tih Health Ministry chuan nimin zing khan a tarlang. Pathiannia hmuhchhuah 40,134 ai khan 24% in an tlem zawk a, sample nuai 16.4 test leh a ni bawk.

Ni sarih chhunga a ṭum khatna atan Thawhṭanni khan nikhata hri kai thar 40,000 hnuailamah a tlathla. Ramchhunga hri kai mek, active caseload hi nuai 4.05 ah tla thla bawk. Hri kai mek hi, hri kai tawh zawng zawng aṭanga chhutin 1.28% an ni.

Kartin leh nitina hri kai thar rate hi hlauhawm chhinchhiahna 5% hnuailamah awmin- 1.85% leh 2.39% an ni mek. Hetih lai hian mi pakhatin midanga hri a kaidarh dan, 'R' factor erawh 1.0 chunglam a la ni a, hei hi a la him lo hle.

AIIMS (Delhi) hotu Dr Randeep Guleria chuan Pathianni khan 'R' value chu a sang zel a; kar li liamtaa 0.87 aṭangin niminah 1.0-ah a sang chho leh tawh tih a sawi. Hri inkaidarh zualna hmunah te khauh taka inkhuahkhirhna siam turin a chah.

Kerala chuan Maharashtra lehpelin state zinga hri leng hluarna ber a ni mek. Thawhṭanni khan hri kai hmuhchhuah 13,984 leh thihpui 118 an awm. Ni ruk liamtaa nitin hri kai 20,000 chuang an awm ziah hnuah hri kai thar hi an tlahniam ve ta deuh a ni.

Kar liam ta khan Kerala health minister Veena George chuan hri leng chu an thunun thei tawh tih a sawi a, damdawi-in khum leh medical oxygen mamawhtu pawh an tlahniam tawh hle tih sawiin, vaccine tam thei ang ber semchhuah anih theih nan theihtawp an chhuah thu a sawi.

Hri leng thawh hnihna tir lama active case nuai sarih chuang awmna Maharashtra-ah Thawhṭanni khan hri kai thar 4,869 leh thihpui 90 an awm a, hri kai mek 78,700 an awm bawk. State chhunga district tam takah khuahkhirhna thlahdul a ni a; mall, gymnasium leh salon-te chu hawn phal a ni. District 11-a hri kai tamna hmunah erawh thlahdulna hi kalpui a ni ve lo.

Nimin zinga data tihchhuahah, Maharashtra leh Kerala leh state panga-ah chiah Covid-19 kai 1,000 chuang hmuhchhuah tharna an awm. Chungte chu Karnataka (1,285), Tamil Nadu (1,957), Andhra Pradesh (1,546), Odisha (1,032) leh Assam (1,275) te an ni.

Delhi-ah Thawhṭanni bik khan Covid kai thar 51 chiah an awm tawh a, deputy chief minister Manish Sisodia chuan school leh college hawn leh an tum hnai tih a sawi a, mipui 35,000 vel ngaihdan an lak aṭangin a tam zawk chuan khuah khirhna khauh tak zawm chunga zirna-in hawn an duh tawh tih a sawi.