Fuel man sang duh lohna lantirin Eptuten cycle protest an nei

Congress hruaitu, Rahul Gandhi hoin nimin khan eptu pawl hruaitute chuan ram chhunga fuel man sang zel duh lohna lantirin cycle protest an nei. Parliament session-a tel turin cycle-in an kal.

Kar liam ta khan Rahul Gandhi hian farm law pathum duh lohna heng dan siam tharte sut leh tura phutna lantirin tractor-in Parliament hi a lo pan tawh bawk.

Nimin zing khan Gandhi hian Constitution Club-ah eptu party 11 hruaitute chu breakfast meeting a neihpui bawk a, he hunah hian Parliament monsoon session hmabak la awmah BJP kaihhruai sorkarin democracy kalphung kalh leh, mipuite tana ṭha lo tur zawnga policy a siamte dodal tura an inlungrual a ṭul thu a sawi. Gandhi chuan tuna hnaia Pegasus spyware chungchang buaina thlenga sorkar inrawlhna duh lohna lantirnaah eptute chuan lungrual taka an thawhho a ṭul thu sawiin, "Mipuite aiawhte lungruak taka kan aw kan chhuah tam chuan BJP-RSS tan min khap leh khuahkhirh pawh a har ve zel dawn a ni," a ti.

Meeting-ah hian Congress MP 100 vel bakah eptu party hrang hrang hruaitute an tel a, meeting hmasaa tel lo Trinamool Congress aiawh pawh an tel. Meeting zawh hian Gandhi leh hruaitu ṭhenkhatte chuan cycle-in Parliament hi an pan a ni.