Maharashtra-ah high-level team tir

Maharashtra-ah Zika virus kai hmuhchhuah thar an awm avangin sorkar laipui chuan Thawhṭanni khan high-level team an tir nghal.

Union Ministry of Health & Family Welfare chuan Zika virus hmuhchhuahna hmunte enthlithlai tur leh hri darh tur khuahkhirhna kawnga state sorkar hmalakna pui turin multidisciplinary team chu hmanhmawh takin a kal tir nghal a ni.

Member pathum awmna central team-ah hian office of Regional Director (Pune)-a damdawi lama mithiam,public health expert, Lady Hardinge Medical College (Delhi)-a hmeichhe lam doctor,gynaecologist leh National Institute of Malaria Research (NIMR), ICMR (Delhi)-a rannung chanchin zirmi,entomologist-te an tel a ni.

Health ministry chuan team hian Union Health Ministry-in Action Plan for Zika Managemen a siam chu kenkawh a nih leh nih loh an enfiah dawn tih a sawi. Maharashtra-a Zika virus khuahkhirh turin mipui taksa leh rilru hriselna tura zawm tur pawimawhte an rawn dawn a ni.

Zika virus kai hi July 30 khan Purandar tehsil (Pune)-a Belsar khuaah hmuh chhuah a ni. Pune district health officer Dr Bhagwan Pawar chuan Belsar khaw chhehvel khaw li/nga velah enfiah hna pawh kalpui a ni thu a sawi. "Hri kai nia rinhlelhte sample te hi lakkhawmin National Institute of Virology Pune-ah thawn a ni.Khawchhunga thosi inthlahpunna hmunte chu tihchhiat vek an ni" a ti.

Zika virus te hi thosi chikhat Aedes species-in (chhun laia che chi)mihring an sehin an kai thei a ni. He thosi vek hian dengue, chikungunya leh yellow fever te pawh a theh darh thei a ni.