Assam-ah Sharjeel hruai tum

Assam Director General of Police (DGP) Bhaskar Jyoti Mahant chuan Jawaharlal Nehru University (JNU) zirlai, Sharjeel Imam chu Bihar-a man a nih hnuin Assam-a lak chhoh dan an ngaihtuah dawn tih a sawi. 

JNU zirlai Sharjeel Imam hian Citizenship Amendment Act (CAA) duh lohna a lantirnaah, hmarchhak bial chu India ram aṭanga lakhran mai tur a ni ti zawngin thu a sawi. A thusawi hi inhuatna chawk tho thei leh, India ram pumkhatna tichhe thei a nih avangin ram phatsantua puhna thubuai siamsak zui a ni. Sharjeel Imam lakah hian Assam police leh Uttar Pradesh police-te chuan thubuai an ziaklut a ni. Hei bakah hian state dang pathumah pawh thubuai hi siamsak a ni bawk. 

Thubuai siamsak a nih hnuah Thawhlehni khan Sharjeel hi Bihar-a Jehanabad-ah man a ni a, Delhi-ah hruai a ni. Nilaini khan Delhi court chaun Delhi Police crime branch kutah ni nga awm turin a ti. Sharjeel hi IIT-Bombay chhuak niin, he hmun aṭang hian Computer Science-ah B.Tech leh M.Tech a zo a, hemi hnu hian JNU-ah Moden Indian History-ah MA leh M.Phil zoin, tunah hian Ph.D a ti leh mek a ni. 

Sharjeel hian a hma pawhin Ayodhya thubuai chungchanga Supreme Court thutlukna siam chu na takin a lo sawisel tawh a, court thutlukna duh lohna lantir tur hian mipuite pawh a lo sawm tawh a ni. CAA leh NRC dodalna lantir a nih hnuah Facebook kaltlangin nawrh huaihawtte a thlawpna a lantir fo a, duh lohna lantir chu zawm turin mipuite a sawm fo a ni. 

Assam DGP Mahanta chuan production warrant an lak hnuah Sharjeel hi Assam-ah a thubuai hmachhawn tura hruai tum a ni, a ti. Delhi-a thu zawhfiahnaah pawh Assam police team aiawh pawh a tel tih a sawi bawk.