Eptu party 14-ten thuchhuah inṭawm siam

Eptu party 14-te chuan nimin khan thuchhuah inṭawm siamin, Pegasus spyware chungchang chu Parliament session neih mekah sawiho an phût tih an tarlang. Ram security khawih thei a nih avangin Unoin Home Minister pawh hemi chungchang sawifiah ngei turin an phût tih an sawi bawk.

BJP sorkar laipui chuan eptute Pegasus chungchang sawiho an phutna chu ngaihsak lo leh hnial tlatah puhin, Parliament session neih mekah rorel mumal thei loa an awmnaah pawh sorkar chu mawhphurtu awmchhun a ni, an ti.

"Sorkarin Parliament rorel mumal thei loa a awm chhanah eptu lamte puh leh an thiam loh zawk ni awm taka dik lo taka a sawikual ṭhin chu pawi kan ti hle a ni," tiin Parliament rorel mumal theih loh chhan dik tak chu sorkar vang a ni tiin, eptute thil phût chu hnial luih tlat vang a ni, tiin an thuchhuahah an tarlang.

Eptute hian Pegasus spyware, fuel leh thil dang man sang zel leh farm law chungchangte House-ah sawiho phûtin an aubuai a, Parliament monsoon session neih mek chu rorel mumal thei loin ni tam tak an khawhral tawh a ni.

Sawiho remtih hunah rorel inkhawm tluang taka kal remti dawn : Shiv Sena
Shiv Sena MP Arvind Sawant chuan sorkar laipui chu thutiam hlen loah puhin, Parliament session neih meka eptuten thil hrang hrang sawiho an phutte chu sorkarin a remtih a, sawiho a nih hun tur ruat fel a nih hunah rorel inkhawm pawh tluang taka a kal an remti ve thei dawn tih a sawi.

Sawant chuan Pegasus chungchang chu ngaihtuahho ngai, thil thleng lian tham anih laia sorkar laipuiin thu dik tawk lo a sawi tlat chuan sawiho an duh tak tak lo tih a lang chiang a ni, a ti.

BJP hi eptu lama an ṭan lai khan 2G leh Coal scams vangin Parliament chu thla khat rorel thei loin an lo tibuai tawh tih sawiin, Sawant chuan sorkar laipuiin tuna eptute chet dan na taka a sawisel leh chu a hriatthiam loh thu Shiv Sena MP chuan a sawi. "BJP hi eptu lama an awm lai khan 2G leh Coal scam vangin rorel thei loin thla khat chuang House rorel an tibuai a ni," tiin Pegasus leh issue dang sawiho tura eptuten an phût chu sorkar lamin sawiho ni tur a ruat phawt chuan Parliament in hnihah tluang taka rorel an remti dawn tih a sawi bawk.