Home ministry-in CBI hotu hlui laka action la turin ti

Union home ministry chuan Central Bureau of Investigation (CBI) director hlui Alok Verma chu a official position hmang dik lo leh, service rules bawhchhiaa puhin a laka disciplinary action la turin Department of Personnel and Training (DoPT) hnenah a hrilh.

Home ministry ngenna hi DoPT hian a pawm a, Alok Verma laka disciplinary action lak a nih chuan a pension hamṭhatna a dawngte pawh titawpsak a ni thei dawn niin official-te chuan an sawi.

1978-batch (retired) Indian Police Service (IPS) officer Verma hi CBI hotu a nih lai khan eirua inpuh tawnin a deputy, Gujarat-cadre IPS officer Rakesh Asthana nen an inkar boruak a chhe hle.

Kum 2017, February 1 khan Verma hi CBI Director-ah dah niin, kum hnih awm tura tih a ni. Mahse kum 2019, January 10 khan a term tura tih a zawh hmain Verma hi a post aṭang hian banin, Director-General of Fire Services, Civil Defence and Home Guards-ah dah a ni. Verma hian post thar an pek hi duh loin, kum 60 a tlin tawh avangin pension a dil ta zawk a ni.

DoPT chuan home ministry-in Verma laka action la tura a hrilhna hi IPS officer la tu, Union Public Service Commission (UPSC)-ah a thawn ve leh a ni. IPS offier-te chungah hremna pek a nih hmain UPSC hi hrilh leh biakrawn hmasak tur a ni tih official-te chuan an sawi.