Covid-19: India dinhmun Ni khat chhungin hri kai hmuh chhuah thar mi 9,800 awm
Hripui lengin zual lam a pan zel a, ni khat chhunga hri kai hmuh chhuah thar tam ber ni thleng lehin, mi 9,800-in an kai tih hmuh chhuah leh a ni.
Ni khata kai hmuh chhuah tam ber ni a thleng chho deuh char char a, tun ang renga kai rate hi a tam chho zel a nih chuan ni khatah sing chuang hmuh chhuah ṭum a thleng thuai dawn niin a lang.
India ram pumah hripui leng kai mi 2,26,770 an awm tawh a, Italy nen kan dinhmun a inthlau tawh lo hle. Enkawl dam tawh 1,09,462 awmin hri kai mek 1,10,960 an awm a, thihpui 6,348 an awm tawh bawk a ni.
Nimina Ministry of Health and Family Welfare report tihchhuah hma darkar 24 chhung khan mi 5,355 enkawl dam awmin, thihpui 273 an awm bawk. Enkawl dam rate hi ni hmasa lam aiin a pung hret a, 48.27% ah a kai chho tawh a ni.
Indian Council of Medical Research (ICMR) chuan darkar 24 chhungin sample 1,43,662 an enfiah hman thu sawiin, sample an enfiah tawh zawng zawng chu 43,86,376 a nih thu an sawi.
ICMR hian ni telin hma an la nasa zual sauh sauh a, tunah hian India ram pumah coronavirus test-na tur laboratory 724 awm tawhin sorkar laboratory 507 leh private laboratory 217 a awm a ni.