Ni khatah mi 25-in Covid-19 kai belh Delhi-ah mi 50 aia tam punkhawm khap
Union health minister Harsh Vardhan hoin Pathianni khan Covid-19 chungchangah group of minister (GOM) meeting neih a ni. Meeting-ah hian Pathianni khan ram chhungah he hri kai thar hi mi 25 an awm tih tarlan a ni.
Pune-a National Institute of Virology chuan Pathianni khan mi 25-in he hri hi an kai tih an tarlang a, India ram chhunga nikhata he hri kai an tam ber ṭum a ni. Union health ministry-in a tarlan danin, India ramah he hri kai hi mi 110 an tling tawh a, an zinga mi 13-te enkawl dam an ni tawh bawk. Hri kai mi 110 zingah hian ramdang mite pawh an tel.
New Delhi-a ṭhutkhawmna neihah hian Covid-19 chungchanga sorkar laipui hmalakna sawiho a ni a, hmalak zel dan tur pawh sawi a ni bawk. Hri kai nia rinhlelh dahhran, hmaikawr, kutkawr, kut silna leh testing kit-te chu sorkarin eng angin nge a kalpui tawh tihte pawh sawiho a ni bawk.
Delhi-ah mi 50 aia tam punkhawm khap
Delhi chief minister Arvind Kejriwal chuan Covid-19 leng mek avangin Delhi-a night club, gym leh spa-te chu March 31 thleng khar an nih tur thu nimin khan a puang. CM chuan mi 50 aia tam punkhawm khap a nih thu a puang bawk a, mahse hei hian inneih lawmna erawh a huam tel lo. Hemi rual hian CM chuan inneih leh function pawimawh dangte pawh a hun sawn hla hram turin mipuite a ngen nghal bawk.
Kejriwal chuan Covid-19 kai rinhlelhte dah hranna tur chu hotel pathumah buatsaih fel a ni tawh tih a sawi. Delhi-ah hian hri kai hi mi pasarih hmuh an ni tawh a, an zinga pahnih chu enkawl dam niin pakhatin a thihpui a ni.
Delhi-a Shaheen Bagh leh Jamia Milia Islamia-ahte chuan Citizenship Amendment Act (CAA) duh lohna lantira nawrh huaihawt chhunzawm reng a la ni. Shaheen Bagh-a nawrh huaihawtte chuan hmaituamna leh kut tihfaina, hand
sanitizer pek an nih avangin hri leng chungchangah hlauthawn tur a awm lo, an ti.
RS chairman-in ticket cancel fee la lo turin ngen
Rajya Sabha chairman M.Venkaiah Naidu chuan hri leng avangin mi tam takin thlawhtheihna leh rel ticket an lak sa cancel a ngai tih sawiin, ticket cancel fee laksak lo tura ngenna chu ngaihtuah turin sorkar laipui a ngen.
Nimina RS inkhawmah CPI member Elamaram Kareem chuan ram pawn leh ram chhunga zin tum tam takte chuan sorkar thurawn angin an zin tumte an ṭhulh tih sawiin, ticket cancel fee chawi tel ṭhin chu laksak lo se an duh thu a sawi. Hemi chungchangah hian sorkar laipui pawh lo nawr turin House chairman hi an ngen a, hemi hnu hian Naidu pawhin an ngenna hi sorkar laipui chuan ngaihtuah se a duh thu a sawi a ni.