CCA-ah minority community dang telh tum lo

Sorkar laipui chuan Citizenship Amendment Act (CAA) hnuaia India khua leh tui nihna pek theih tur, minority community dah sa bak chu a dang dah belh tumna a awm lo tih a sawi.

Sawisel hlawh tak, CCA-ah hian Pakistan, Bangladesh leh Afghanistan aṭanga India rama lut zinga Hindu, Sikh, Jain, Buddhist, Parsi leh Kristian-te chu India khua leh tui nihna pek theih an ni dawn. He danah Muslim-te telh an ni lo thung.

Union minister of state for home Nityanand Rai chuan Rajya Sabha inkhawma zawhna a chhannaah, minority community dang dah belh rawtna a awm lo tih a sawi a ni.

Minister chuan, "CCA hnuaia khua leh tui nihna dil thei chin pawhin sorkar laipuiin dante a tihchhuah hnuah chauh dilna an thehlut thei ang," a ti.

CAA hi kum 2019, December 12 khan pawm niin kum 2020, January 10 aṭangin hman ṭan a nih thu minister chuan a sawi bawk. Mahse he dan hnuaia rules siamtu tura din, Committees on Subordinate Legislation, Lok Sabha and Rajya Sabha chuan rules siamna atan hian kum 2022, January 9 thleng hun pekbelh an lo dil tawh a ni, hei hi ṭum nga hun pek belh an nihna a ni.

Parliament-a CAA pass a nih hnuah ram chhung hmun hrang hrangah he dan duh lohna lantirin nawrh huaihawt a ni a, hmun tam takah tharum thawhna pawh chhuakin mi 100 dawnin an thih phah a ni.