Pegasus report hi a dik chuan ngaihtuah tham tak a ni - SC

Supreme Court chuan nimin khan Pegasus spyware chungchanga petition thehluh chu ngaihtuahin, media report-a Pegasus hmanga midang phone enthlak nia sawi chu thu dik anih chuan thil serious tak, ngaihtuah ngai tak a nih thu a sawi.

Chief justice NV Ramana kaihhruaiin member pahnih awmna bench chuan petition lutte hi an ngaihtuah a, petition an thehluhna copy chu sorkar laipuiah pe vek turin an hrilh bawk. Karleh Thawhlehniah hearing neih a nih leh dawn a, hemi hunah hian sorkar laipui aiawh pawh tel tura tih a ni.

Pegasus spyware chungchanga chhui chian phutin SC-ah hian petition eng emaw zat thehluh a ni tawh. Editors' Guild of India pawhin petition thehlutin, sorkar laipui chu spyware contract a ziahpui dan kimchang zawt turin an ngen.

Senior journalist N Ram leh Sashi Kumar-te chuan mi eng emaw zat phone enthlak nia sawi chungchang hi judge hlui kaihhruaiin Special Investigation Team (SIT) chhui tir an phut bawk.

Tun hnaia khawvel media lar tak takten an tarlanah, Israel spyware Pegasus hmang hian mi phone eng emaw zat enthlak a ni a, heng zingah hian India rama phone 300 telin an zingah hian Rahul Gandhi, poll strategist Prashant Kishor, union minister ṭanglai pahnih, election commissioner hlui leh journlaist 40-te number pawh a tel a ni.

Pegasus hian sorkar chauh contract a ziahpui ṭhin avangin he thil thlengah hian BJP kaihhruai sorkar pawh inhnamhnawiha eptute chuan an puh a, Parliament-ah pawh hemi chungchang sawiho an phut a, mahse sorkar lamin a remtih pui loh avangin rorel thei loin vawi tam tak an inaubuai tawh a ni.