MP Assembly session titawp laiawk SC-ah BJP an zualko

Politics buaina tawk mek Madhya Pradesh assembly session chu March 26 thleng Covid-19 darh zel vangin tihtawp lailawk a ni. Governor Lalji Tandon chuan nimin khan minute khat thu a sawi zawh hnuah house hi khar a ni a, BJP lam an lungawi lo hle.

Kamal Nath kaihhruai Congress sorkar hi nimin khan floor test hmachhawn tur an ni a, mahse house inkhawm tihtawp lailawk a nih tak avang hian eptu party BJP lam chu an lungawi lo hle a ni. Congress lam hian Covid-19 darh zel vang hian assembly inkhawm chu tihtawp lailawk an phut. Governor-in thu a sawi zawh hnua house a chhuahsan hnuah pawh MLA tam tak chu house-ah la ṭhu hnufualin 'slogan' hmangin an inau el a ni. BJP lam chuan Kamal Nath sorkar chu coronavirus chuan a chhanhim dawn lo tih sawiin, majority a neih tawh loh vanga trust vote hmachhawn ngam loah an puh.

MP Assembly tihtawp lailawk a nih avang hian BJP lam an lungawi lo hle a, MLA 10-in Supreme Court hnenah Kamal Nath kaihhruai sorkar chuan floor test an hmachhawn ngei theihna turin petition an thehlut. Heng MLA zingah hian chief minister hlui Shivraj Singh Chouhan pawh a tel. 

Petition an thehluhah hian BJP hruaitute chuan Congress MLA 22 an ban thu leh hemi vang hian Madhya Pradesh-a sorkarna siam mek chu minority an ni zawk tawh tih an ziak. Governor pawhin floor test chu Thawhṭannia neih turin thupek a tichhuak vek tawh a, mahse ngaihtuah turah hemi chungchang hi a awm lo a; house khar lailawk chu thil tum lawk a nih thu an ziak bawk. Hemi chungchang hi Supreme Court chuan vawiinah hian a ngaih­tuah rin a ni.