Mall, restaurant leh sakhaw hmun atan Inkaihhruaihna sorkarin siam

Sorkar laipui chuan hripui leng vanga inkharkhipna a siamte a thlahdul chho mek a, June 8 aṭangin shopping mall, restaurant leh sakhaw hmun hrang hrangte pawh hawn a ni tawh dawn. Hemi atana inkaihhruaina hi Ningani khan sorkar chuan a tichhuak. 

Khuahkhirhnate thlahdul mek ni mah se sorkar chuan kum 65 chung lam, natna benvawn nei, naupai lai leh naupang kum 10 hnuai lamte chu in lamah la tawmim chhunzawm zel turin a ti. Pawn chhuahin face mask hman ngei ngei tur a ti bawk. Kut sil uar a, a remchan lohnaah chuan alcohol based hand sanitizer hmanga second 20 tal kut tifai ṭhin turin a chah a ni. 

Shopping mall-ah chuan a luhnaah kut tihfaina tur leh thermal screening dah vek tura tih a ni a, face mask hmang lo chu luh phal a ni lo a, mall chhunga awm lai pawhin vuah reng tur a ni a, natna neite an luh phal a ni lo ang. Social distancing kalpui theihna turin luh thei zat pawh mall enkawltuten an ruahman tur a ni. 

Restaurant-te chu dine-in aiin takeway lam uar chhunzawm tura tih an ni. Luhnaah kut tihfaina leh thermal screening dah vek tur a ni. A chhungah pawh face mask hman reng tur a ni a, social distancing zawm tur a ni bawk.

Home delivery ti turte chuan direct-in an pe tur a ni lo a, kawngka bulah ei tur bawmte chu an dah tur a ni a, ei tur pek chhuah hmain a semtu turte chu restaurant lamin screening an neih sak zel tur a ni.

Sakhaw hmun pawimawhah a luhnaah kut tihfaina leh thermal screening neihna dah tur a ni a, face mask hmang chauh luhtir an ni ang. Pheikhawk phelh ngai a ni pawhin motor-ah phelh lawk tur a ni. A chhungah mi lim leh lehkhabu thianghlim awmte kuta khawih phal a ni loa, ṭum khatah mi tam tak inkhawm khap chhunzawm zel a la ni. 

Ṭawngṭaina tur, prayer mat pawh mahnia inken tur a ni a, inkhawmte tui thianghlima theh phal a ni lo.