Sorkar laipuiin Rajiv Gandhi Khel Ratna Award hming thlak

Prime minister Narendra Modi chuan India rama sports lama chawimawina sang pek ṭhin, Rajiv Gandhi Khel Ratna Award chu a hming thlakin, Major Dhyan Chand Khel Ratna Award tih a ni tawh dawn tih nimin khan a puang. Dhyan Chand hi India hockey hero a ni.

Prime Minister chuan ram chhung hmun hrang hrang aṭanga Khel Ratna Award chu India rama sports lama mi hmingthang, Major Dhyan Chand hming chawitir tura ngenna a dawn thu sawiin, hei vang hian Award hming hi thlak a ni tih a sawi.

Dhyan Chand piancham hi India ramah National Sports Day atan hman a ni a, Olympics-ah India ram tan gold pathum a la a ni.

Sports minister Anurag Thakur pawhin, "Major Dhyan Chand hi India-in sports lama a mi chhuanvawr a ni a, hei vang hian sports lama chawimawina sang ber pek ṭhin pawh a hming chawitir hi a inhmeh hle a ni. A nun leh hlawhtlinnate khan infiammi tam tak cho phurin, India ram taka hlawhtlinna ropui tak takte an neih phah a ni," tiin a twitter lamah a sawizui bawk.

Khel Ratna Award hi central-a Congress kaihhruai UPA sorkar lai, kum 1991-1992-a siam kha niin, he award hian medallion, certificate bakah pawisa fai cheng nuai 25 a keng tel a ni. He chawimawina dawng hmasa ber chu chess legend Viswanathan Anand a ni.