Covid-19 kai thar 44,643 awm belh leh : Nilaini aiin hri kai 4% in pung

India ramah Ningani khan Covid-19 hri kai thar 44,643 an awm leh a, Nilaini aiin hri kai 4% in an tam zawk. Hri vanga thi 464 awm belhin, hri vanga thi tawh zat hi mi 4,26,754 an tling tawh.

Nitin test aṭanga hri kai zat,daily test positivity rate chu 2.72% a ni mek a, dama puan, recovery rate chu 97.36% a ni.

Kerala chu hri kai hmuh chhuah thar tamna ber niin, Ningani khan hri kai thar 22,040 an awm. Hri vanga thi 117 an awm bawk.

Andhra Pradesh-ah hri kai thar 2,145, Tamil Nadu-ah 1,997, Karnataka-ah 1,785-te awmin, chhimlama state zinga hri kai hmuhchhuah tamna te an ni.

India rama hri kai hmuhchhuah tawh tamna ber Maharashtra-ah Ningani khan hri kai thar 9,026 leh hri vanga thi 120 an awm.

Mihring tam berna state,Uttar Pradesh-ah hri kai thar 26 leh thihpui pathum an awm thung.

State lian -Rajasthan, Gujarat, Bihar-ah Ningani khan Covid vanga thi an awm lo a, Uttarakhand leh Jharkhand-ah pawh hripui vanga thi an awm lo bawk.

Hmarchhak state zingah Assam chu hri kai thar tamna ber a ni a, Mizoram (725) leh Meghalaya (576) ten an dawt a ni.

Khualzin tamna hmun Goa chuan hri kai thar 102 leh thihpui pathum an nei.

Coronavirus vaccine dose bikima la tawh te hian a let thum velin Covid-19 kai theihna 'chance' an nei tlem tih UK-a zirchiangtu te chuan an sawi.

Khawvel pumah Covid hri kai hmuh chhuah mi maktaduai 200 dawn an awm tawh tih World Health Organisation (WHO) chuan a sawi. Hri kai dam tawh, mahse Covid hriin a nghawng avanga taksa lama harsatna nei zui tam tak an awm thu sawiin, heng mite hi damdawi lam mithiamte rawn ṭhin turin a chah.