India-ah Covid-19 kai thar 39,070 leh thihpui 491 awm leh

India ramah Inrinni khan Covid-19 hri kai thar 39,070 awmin, hri kai hmuhchhuah tawh zawng zawng hi vaibelchhe 3.19 an tling tawh. Hemi ni vek hian Covid-19 vanga thi 491 awm belh bawkin rampumah hri vanga thi nuai 4.27 an awm tawh a ni.

Hri kai mek, active case chu nuai 4.06 ah an tlahniam. Hri kai tawh aṭanga chhutin hri kai mek hi 1.27% an ni. Inrinni khan dama chhuah 43,910 awmin, hri kai enkawl dam tawh hi vaibelchhe 3.10 an awm tawh.Enkawl dam tawh, recovery rate chu 97.39% ah a sang chho leh.

Nitina hri kai thar zat, daily positivity rate chu 2.27% a ni mek a, ni 13 chhung 3% hnuailamah a awm tawh a ni. World Health Organisation (WHO) chuan Covid positivity rate 5% hnuailama awm te chu hmun him, safe zone-ah a puang.

Inrinni khan Covid vaccine dose nuai 55 chuang semchhuah a ni. Ramchhunga vaccine semchhuah tawh zat dose vaibelchhe 50.68 a ni tawh tih health ministry chuan a sawi. Prime minister Narendra Modi chuan vaccine vaibelchhe 50 chuang semchhuah tawh chuan hripui leng mek dona kawngah tha thona nasa tak a pek belh thu a sawi.

Madhya Pradesh, Gujarat, Rajasthan, Maharashtra leh Uttar Pradesh te chuan vaccine dose vaibelchhe khat chuang an semchhuak vek tawh a ni.

Ramchhunga nitina vaccine siam chhuah ṭhin dose nuai 2.5 chu dose nuai 40-ah tihpun a nih thu Minister of State (MoS) for Health, Dr Bharati Pravin Pawar chuan Zirtawpni khan a sawi.

Delhi-ah Inrinni khan Covid-19 kai thar 72 leh thihpui pakhat an awm. Zirtawpni khan hri kai awm zat, positivity rate chu 0.10% ah sang chho hretin, khawpui chhung bikah hri kai thar 44 an awm.

Delhi Health Minister Satyendar Jain chuan Aam Aadmi Party sorkar chuan hri leng thawh thumna lo thleng thei lakah a chhe ber pawh hmachhawn thei tura an inbuatsaih thu leh Covid kai enkawlna tur khum, dedicated bed 37,000 siam tumin hma an la mek tih a sawi.

US pharmaceutical giant Johnson & Johnson siam, single-dose Covid-19 vaccine chuan India ramah emergency-a hman atan pawm a ni ta. Vaccine dang pali - Covishield, Covaxin, Russia's Sputnik V leh Moderna vaccine-te chu sorkar laipuiin kum tawp hmaa ram mipui puitling chin hnena vaccine pek hman vek a tumna kawngah chak zawka hmalak theihna turin pawmpuina hi pek an lo ni tawh bawk.

US-a hmunpui nei, vaccine siamchhuaktu Novavax chuan India rama emergency-a hman turin phalna an dil mek. India-ah Novavax chuan Serum Institute of India (SII) nen thawkdunin vaccine siamchhuaka hralhchhuak turin an thawkdun dawn. Novavax leh SII ṭangdun hian Covax facility hnenah dose tluklehdingawn 1.1 chuang semchhuak turin an intiam.

India ram chu "red" aṭangin "amber" list-ah an dah tak avangin vaccine dose kima la tawh, United Kingdom-a zin turte chu ni 10 chhung hotel-ah an in khunghran a ngai tawh dawn lo.