CBI-in judge-te chungchang mawi lo taka sawitu mi 5 man tawh

Central Bureau of Investigation (CBI) chuan social media-a Andhra Pradesh High Court leh Supreme Court judge-te chungchang mawi lo taka sawitu mi pahnih man belh lehin, an vaiin mi panga an man tawh tih nimin khan official-ten an sawi.

He thil thleng chungchangah hian YRS Congress MP pahnih, Nandigam Sureh leh Amanchi Krishna Mohan-te pawh chhui chian mek an ni tih official-te chuan an sawi. Anni pahnih bakah hian FIR-a tarlan kher loh, midang pawh an chhui chiang mek tih CBI thupuangtu RC Joshi chuan a sawi bawk.

Judge-te chungchang mawi lo taka ziah chungchangah hian mi 16 chu thubuai siamsak an ni tawh. He thil hi Andhra Pradesh High Court chuan CBI hnenah hian chhui turin a ngen a, High Court thutlukna siam ṭhenkhata lungawi lote chuan social media platform hmangin judge leh juidiciary-te tih hmingchhiat an tum niin a sawi. An post hmang hian high court leh judge-te laka huatna, rinlohna leh an hnathawh danah lungawi lohna chu midang rilruah tuh an tum a ni, a ti. Hetianga social media kaltlanga an beihnaah hian mi pawimawh inrawlh an awm leh awm loh chhui turin a ngen bawk a ni.