PM-Kisan scheme hnuaiah Rs vbc 19,500 sem chhuak

Prime minister Narendra Modi chuan nimin khan virtual hmangin, Pradhan Mantri Kisan Samman Nidhi (PM-KISAN) scheme hnuaia loneitu vaibelchhe 9.75 chuang hnenah cheng vaibelchhe 19,500 a sem chhuak.

Tun ṭum sorkarin PM-KISAN scheme hnuaia loneitute chhawmdawlna tur a semchhuah thawh kua-na a ni a, a semchhuah tawh hi a vaiin Rs vaibelchhe nuai 1.57 a tling tawh a ni.

PM Modi hian pawisa a semchhuah hnu hian he chhawmdawlna dawngtu loneitu ṭhenkhatte chu a kawm nghal bawk.

PM-KISAN scheme hnuaiah hian ram chhunga loneitute chu kum khatah chhawmdawlna, Rs 6,000 ṭheuh pek an ni a, hei hi thawh thuma pein ṭum khatah Rs 2,000 chu direct-in an bank account-ah transfer sak an ni ṭhin. He scheme hi kum 2019, February thla khan kalpui ṭan a ni a, a thawh khatna chu December 2019 - March 2019 huam chhung atan pek a ni.

Virtual programme hmanah hian agriculture minister Narendra Singh Tomar pawhin thu sawiin, a hmain loneitu vaibelchhe 11 vel hnenah Rs vbc nuai 1.37 sem chhuah a lo ni tawh tih a sawi. Hei bakah hian PM-KISAN beneficiary zinga vaibelchhe 2.28 vel chu Kisan Credit Card Scheme hnuaiah thlunzawm niin, hemi hmang hian loan Rs vbc nuai 2.32 pek a ni tawh a ni, a ti.