Lok Sabha-ah Constitution Amendment Bill pass

Lok Sabha rorel inkhawmah nimin khan state sorkarin social and economic backward class an thlan theihna tura thuneihna pek letna tur, Constitution (One Hundred and Twenty-Seventh Amendment) Bill, 2021 chu pass a ni.

Union minister for social justice and empowerment Dr Virendra Kumar chuan bill hi a pharh a ni.

Parliament inkhawm ṭan hma hian Rajya Sabha-a leader of oppo­sition Mallikarjun Kharge chuan eptu party zawng zawngin Constitution Amendment Bill hi an thlawp dawn tih a lo sawi tawh a ni.

Kharge chuan kumin May thla khan Supreme Court chuan social and economic backward class thlang theitu chu sorkar laipui chauh a ni tih a sawi a, mahse hei hi siamṭha a, state sorkarte hnenah anmahni state-a backward class thlang tura thuneihna hi pek let leh tum a ni tiin, hemi kawngah hian sorkar laipui chu an thlawp thu a sawi a ni.