Delhi-ah Covid do nan Colour-Coded Alert siam

Hri leng thawh thumna lo thleng thei laka invenna atan Delhi sorkar chuan hri leng nat dan azira hmalak dan tur, action plan level pali hmangin a siam. Heng inralrinna, alert level hi rawng (colour) hmanga siamin Delhi sorkarin order a tihchhuah rualin hman zui nghal zel an ni ang.

Level-1
Action plan-a tarlan danin, rawng eng, yellow alert chu Level-1 a ni. Delhi-ah ni hnih chhung hri kai zat, positivity rate 0.5% chin emaw hri kai thar 1,500 chin leh, kar khat chhunga oxygen bed 500 an luah emaw chuan Level-1 ah dah an ni ang.

Yellow alert hnuaiah hian dawr chu zing dar 10 -zan dar 8 thleng odd-even basis-in hawn phal a ni ang. Metro service-te chu seating capacity 50% -in service phal a ni. Zin chhuah phalna nei Bus-te chu seating capacity 50% phalsak an ni bawk. Zan dar 10-zing dar 5 thleng zan curfew an kalpui dawn a ni.

Yellow alert-ah hian restaurant-te chu zing dar 8 - zan dar 10 thleng mipui lengzat aṭanga 50% luhtir chungin hawn phal a ni. Bar-te chu chhun aṭanga inṭanin, zan dar 10 thleng 50% capacity-a hawn phalsak an ni bawk.

Level-2
Delhi-ah ni hnih chhung a zawna positivity rate 1% chunglam emaw, kar khat chhung hri kai thar 3,500 emaw, kar khat chhunga oxygen hman ngai khum 700 luahkhah a nih chuan amber alert pek an ni ang. Level-2 alert hnuaiah hian zan curfew bakah kartawpah curfew kenkawh a ni ang. Dawr te chu zing dar 10 aṭanga zan dar 6 thleng odd-even basis in hawn theih a ni.

Metro rail-a passenger-te chu seating capacity 33% chûan phal a ni. Bus zin phalna nei tan seating capacity 50% service phalsak an ni. Restaurant leh bar te chu hawn phal a ni lo a, Hotel erawh hawn phal a ni ang.

Level-3
Khawpui chhungah ni hnih aia tam hri kai zat, positivity rate 2% chunglam an awmin emaw, kar khat chhunga hri kai thar 9,000 emaw oxygen bed 1,000 hman a ngaihin Level-3 ah awmin, orange alert tihchhuah ani ang.

Orange alert hnuaia inkaih­hruaina tarlan danin, stand­alone shops tiam lohin dawr zawng zawngte leh Metro rail service chu tihtawp lailawk a ni ang a, bus zin phalna bik neite chu 50% capacity in service phalsak a ni ang.

Hmasawnna hnathawhte chu an mi chhawrten an site chhunga an riahchilh theih chuan phalsak an ni. Nitin mamawh,essential item siamchhuaktute chiah hnathawh phal an ni. Zan leh kartawp curfew chu kalpui chhunzawm tur a ni bawk ang.

Level-4
Delhi-ah ni hnih chhung a zawna hri kai thar zat,positivity rate 5% chunglama an awm emaw, kar khat chhunga hri kai thar 16,000 chuang emaw leh kar khat chhunga oxygen bed 3,000 an luah khah chuan hri kai nat lam Level-4 ah awmin, Red Alert tihchhuah a ni ang. Orange alert hnuaia khuahkhirhnate chu hman chhunzawm chungin, khawpui chhungah complete curfew puan a ni ang.

Heng alert-te hi kenkawh an nih chuan school, college leh educational institution te chu khar tura tih an ni. Cinema hall, theatre, banquet hall, auditorium, barber shop, salon, spa, gymnasium, yoga centre, leh entertainment park te pawh khar an ni ang. Sakhaw biakna hmunte chu hawn phal ni mah se tlawh phal a ni lo thung.

Alert-te tihchhuah an nihin mipui punkhawm phal a ni lo dawn lo a, inneih leh mitthi vuinaahte chuan eng alert hnuaiah pawh fimkhur takin kal thei zat bithliah vek an ni ang.