PM Modi-an Ujjwala Yojana 2.0 a tlangzarh
Prime minister Narendra Modi chuan nimin chhun dar 12:30 khan video conference kaltlangin Uttar Pradesh aṭangin Ujjwala scheme 2.0 a tlangzarh. Hemi pual hian, Mahoba, Uttar Pradesh-a beneficiary-te chuan liquefied petroleum gas (LPG) cylinder connection an dawng nghal bawk. He hun hi union petroleum minister Hardeep Singh Puri leh Uttar Pradesh chief minister Yogi Adityanath-ten an hmanpui a ni.
Pradhan Mantri Ujjwala Yojana (PMUY) hi May 1, 2016 khan PM Modi chuan Ballia, Uttar Pradesh-ah a hawng. He scheme hi union petroleum ministry siam niin, ram chung thingtlanga cheng in tinte hnena eirawngbawlna gas LPG pekna tur atana ruahman a ni.
Ujjwala 1.0 hnuaiah khan below poverty line (BPL)-a inziaklut hmeichhia maktaduai 50 hnenah March, 2020-ah LPG connection pek hman turin ruahmanna siam a ni. Mahse kum 2018, August thla khan he scheme-ah hian cartegory dang pasarih huam chhunga hmeichhiate chu dah belh leh an ni. Chungte chu - Schedule Cast/Schedule Tribe, Pradhan Mantri Awas Yojana (PMAY), Antyoday Anna Yojana (AAY)-a inziaklutte , ramhnuaia khawsa, hnam hnuaihnung , thingpui huana thawkte leh thliarkara chengte an ni.
Scheme hi ennawn a nih hnuah, LPG connection maktaduai 80 sem chhuah tura tih a ni a, hei hi an hun tiam a thlen hma thla sarih, kum 2019 August thla khan an ti hlawhtling a ni. Kumin July 30 thleng khan he scheme hnuaiah hian connection 79,995,022 pek chhuah a ni tawh.
Ujjwala 2.0 hnuaia beneficiary-te hnenah LPG connection maktaduai 10 dang pek belh tum a ni. Heng connection pek belhna tur hii Union Budget financial year 2021-22-ah puan a lo ni tawh bawk.
A thawh hnihnaah hian beneficiary-te chuan refill vawi khatna leh hotplate man an chawi a ngai dawn lo. Inziahluh dan pawh awlsam zawka siamin, document tlemte bak a ngai lo a. Pemlutte chuan ration card emaw address proof an thehlut tel a ngai lo a, self declartion chu 'family declaration' anga pawm theih niin, hei hi address proof-ah pawh pawh pawm a ni ang.