Thla 5 dawn hnua hri kai tlem ber ṭum thleng : Covid-19 kai thar 28,204 an awm belh leh

India rama hri leng mek karah chanchin lawmawm lam a thleng chho zel a, Thawhlehni khan ram pumah Covid-19 kai thar 28,204 awmin, thla nga dawn (ni 147) hnua hri kai hmuhchhuah tlem ber ṭum a ni tih Ministry of Health and Family Welfare chuan a tarlang. Hemi ni vek hian hri kaihnawih vanga thi 373 awm belh leh bawkin, hripui thihpui 4,28,682 an awm tawh.

Ram puma kartin test aṭanga hri kai zat, national weekly positivity rate chu 2.36% ni mekin nitina hri kai thar zat, daily positivity rate chu 1.87% an ni.

Hri kai mek, active caseload pawh ni 139 hnua a tlem ber ṭum niin, mi 3,88,508 an awm. Health Ministry chuan hri kai hmuhchhuah tawh aṭanga hri kai mek zat hi 1.21% a ni tih sawiin, hei pawh hi March 2020 hnua a hniam ber ṭum a ni.

Thawhṭanni leh nimin zing inkar khan hri kai 41,000 te chu dama puan an ni a, ramchhunga hri kai enkawl dam tawh, recovery rate san ber ṭum a ni mek bawk. Covid-19 recovery rate hi 97.45% niin, hri kai enkawl dam hi mi vaibelchhe 3.11 an awm tawh.

Ministry of Health and Family Welfare tarlan danin, state leh UT hnenah Covid-19 vaccine dose vaibelchhe 52.56 pekchhuah an ni tawh a, dose 48,43,100 te chu semchhuah mai theih tur a awm thu an sawi. Data-a a lan danin Thawhlehni zing dar 8 khan vaccine sem chhuah tawh hi tihriralte chhiar telin dose 51,09,58,562 a ni tawh. State leh UT leh private hospital-ten vaccine dose vaibelchhe 2.07 chuang hman loh an la kawl bawk tih Health Ministry chuan a sawi a ni.

Ram dang miten vaccine la thei tawh dawn
Ministry of Health and Family Welfare chuan rampawn mi, India rama awmte chuan CoWin portal-a inziaklutin Covid-19 vaccine an la ve thei dawn tih a sawi.

Ram dang mi, CoWin kaltlanga vaccine la turte hian an passport chu an nihna tichiangtu, identity document atana hmangin an inziaklut ang a, portal-a an register fel hnuah vaccine hi an la thei dawn a ni.

"He ruamhmanna hi India rama ram dang mi chengte an himna tura siam a ni. Ramchhunga cheng, vaccine la lo hnen aṭanga hri inkaidarh awm thei pawh a tihziawm phah ang. Covid-19 hri leng kan chhutchah theihna tur leh kan vaia kan himna tur atana tih a ni," tiin Health Ministry chuan a tarlang.