Muslim duh lohna aupui chungchangah BJP hruaitu Ashawani Upadhyay leh midang 5 man

Delhi Police-te chuan Pathiannia Janatar Mantar-a Muslim-te duh lohna leh huatna thu aupuitu zinga mi paruk an man tih nimin khan an sawi. An mi man zingah hian BJP spokesperson hlui leh advocate Ashwini Upadhyay pawh a tel.

Police-te chuan heng mi parukte hi khawpui chhung hmun hrang hrang aṭangin an man tih an sawi.

Pathianni khan Bharat Jodo Aandolan buatsaihin Jantar Mantar-ah huaihawt a ni a, media in-charge Shipra Srivastava chaun narwh hi Upadhyay kaihhruaina hnuaiah neih a ni tih a sawi. Mahse nawrh huaihawtna hmun Muslim-te huatna thu aupui chungchangah erawh inhnamhnawihna an nei lo tih a sawi thung.

Srivastava chuan, "Colonial law duh lohna lantir leh, British hun laia dan siam 222-te tibo tura phutin nawrh hi huaihawt a ni," a ti. Hetih lai hian nawrh huaihawtnaa Muslim-te huatna leh vauna thu aupui lai video chu social media lamah a darh nasa hle thung a, heng mite hi tute nge an ni tih an hriat loh thu Srivastava chuan a sawi a ni.

Upadhyay pawhin he thilah hian inhnamhnawihna a nei lo tih sawiin, video darh pawh chu enfiah turin Delhi Police-ah complaint a thehlut tih a sawi bawk.