Oxygen indaih loh vanga thi state pakhatah chiah awm : Sorkar Laipui

Covid-19 hri kai zinga oxygen indaih loh vanga thihna thleng chu state pakhatah chiah awmin state dang zawngah chuan hetiang case hi a awm lo tih sorkar laipui chuan a sawi.

Sorkar laipui hian Rajya Sabha inkhawmah India rama hripui leng thawh hnihna na taka a thlen mek karah, hri kai enkawl zingah oxygen indaih loh vanga thi an awm lo tiin a lo sawi tawh a ni. Hei hian sawizui a hlawhin inhnialna pawh a siam nasa hle. Hri leng thawh hnihna thlengah hri kai leh thihpui an pung nasa a, state hrang hrangah dam lo enkawlna tur oxygen indaih lohna a thleng nia sawi a nih avangin ram hrang hrang pawhin hri kai enkawlna, oxygen concentrator leh damdawi hmanraw dangte ṭanpuina an pe hlawm a ni. Hetih lai kara sorkarin oxygen indaih lohna vanga hri kai zinga thi an awm lo tih a sawi hian sawizui a hlawh hle a ni.

Mahse sorkar laipui chuan oxygen indaih loh vanga thi awm leh awm loh chungchang hi state hrang hrangte zawh a nih thu sawiin, " Tun thlenga report kan dawn tawhah chuan state pakhat chauhin oxygen indaih loh vanga thi an awm nia hriat thu hi a sawi a, state dangin an sawilang lo," tiin health ministry joint secretary Lav Agarwal chuan a sawi bawk. Oxygen indaih loh vanga thihna thlenna state hi eng state ber nge tih a sawilang lo bawk.

Indian Council of Medical Research chuan Covid-19 vanga thite chhinchhiahna atan WHO framework zulzuiin inkaihhruaina dan bik siam a nih thu a sawi a, sorkar laipui chuan state tinte chu mitthi zatte chu zirchiang a, report kimchang rang taka thehlut zel turin a hrilh bawk a ni.