Twitter-in Congress party official handle a lock sak

Twitter chuan Thawhlehni khan Congress party official handle chu microblogging site inkaihhruaina dan bawhchhia nia sawiin a lock sak.

Congress chuan social media platform dang Facebook kaltlangin Twitter-in an party account an lock sak chungchang hi an tarlang a ni. "Kan hotute tanina khung an nih khan kan zam lo a, Twitter-in account min tihtawp sak avanga kan hlauhna tur a awm chuang lo. Congress kan ni a, mipuite hnena kan chah duh chu ram tan kan bei ang a, kan bei chhunzawm zel ang. Hmeichhe naupang pawngsual tawk tana rorelna dik phuta kan auchhuahna chu thilsual nia an ngaih chuan, heng thilsual an tih hi vawi 100 chuang kan la tih chhunzawm zel dawn a ni," an ti.

All India Congress Committee (AICC) Social Media head Rohan Gupta chuan mipuite aiawh a, an tana an beihna chu eng thil mahin a dal dawn lo tih a sawi.

Sorkar laipuiin a nawrna avangin Twitter chuan ram chhung hmun hrang hranga party hruaitu leh worker 5,000 chuang account chu a block sak tawh tih a sawi bawk. Twitter thil tih dan pawh chu zawtin Gupta chuan, "Twitter hian dan bawhchhetute account hi sorkar laipui ngenna angin a block a ni. Twitter hi sorkar laipui thuhnuaia awm ang maiin a chechhuak ṭhin. Twitter kalhmang bawhchhiatna a nih chuan engvangin nge August 2 - August 5 inkar khan Scheduled Caste (SC) commission handle-ah pawngsual tawktu chhungkaw thlalak pholan a nih?," tiin a zawt let

August 7 khan Twitter chuan Congress party hruaitu, Rahul Gandhi Twiiter account chu an block sak a, ni nga chhung chu an block sak tawh a ni. Rahul Gandhi hian a Twitter-ah Dalit hmeichhe naupang, pawngsual rawn a nih hnuah an thah zui tak tana rorelna dik a phutna thu a ziahah an chhungkaw thlalak a dah a, hei hi sorkar chuan complaint-in dan bawhchhiaah an puh a ni.

Microblogging site chuan Nilaini zan khan Congress member ṭhenkhat leh an general secretary (organisation) KC Venugopal, AICC officebearer Ajay Maken, Sushmita Dev leh Randeep Surjewala leh Lok Sabha MP leh AICC Telangana in-charge Manickam Tagorea account-te pawh an block sak bawk a, Rahul-a personal staffer KB Byju-a account pawh an suspend sak bawk.

Case tina thupek tihchhuahah content te hian Twitter dan an bawhchhiat bakah a hmangtu(user) te chuan an account dik lo taka an lock sak chuan ṭanchhan mumal tak neiin an khinglet thei a ni, a ti.

Rahul-an Dalit hmeichhe naupang kumtling lo an pawngsual rawn hnua an thah tak chhungkaw thlalak a post vang hian sorkar laipui chuan Twitter policy a bawhchhiat vanga sawiselin an suspend sak a ni. Account thar pawh hi complaint ngai bawk hmangin an suspend sak leh a ni. Account an suspend sak te hian Rahul-an hmeichhe naupang chhungte a hmuh hnua an din “Main Bhi Rahul” campaign an zawm leh vek tawh a ni.

AICC thupuangtu Pranav Jha chuan dik lo taka Congress hotute Twitter account tihtawp a nih chungchanga mawhphurtu ber chu prime minister Narendra Modi leh sorkar laipui an nih thu sawiin, Twitter pawh a dem thu a sawi bawk.