Death certificate-ah pawh PM thlalak a chuang tur a ni : Mamata Banerjee

West Bengal chief minister Mamata Banerjee chuan Ningani-a press conference a neihah, Covid vaccination certificate-a prime minister Narendra Modi thlalak chuan teltir a nih chungchang chu elsen taka sawiin, "Covid-19 vaccination certificate-ah i(Modi a sawina) thlalak i chuan tir a, death certificate-ah pawh chuantir ve rawh," a ti.

Mamata Barnejee chuan West Bengal-in sorkar laipui hnen aṭangin Covid-19 vaccine duhkhawp an hmu dawng lo tih a sawi bawk. Vaccine hi thingtlang lam bial mipuite pek an nih theih hma chuan state sorkar chuan local train service a la phal dawn lo tih a sawi bawk.

West Bengal sorkar chuan Ningani khan Covid-19 khuahkhirhna dan siam chu August 30 thleng atan state pumah a pawtsei. Mahse zan lama curfew chu thlahdul deuhin, a hmaa zan dar 7-zing dar 5 inkar night curfew puan chu, zan dar 11- zing dar 5-ah titlai a ni.

Banerjee chuan hripui leng vangin lungin tang mek zinga kum 55 chung lam mi 73-te chu ngaihnathiamin chhuah zalen an ni dawn tih a puang bawk. Tang chhuah turte hi dam chhung tang tura thiam loh chan tir vek an ni. A hmain hri leng vangin thiam loh chantir tawh mi 63-te chu chhuah zalen an lo ni tawh bawk.