Health Minister-in WHO chief scientist a kawm

Union health minister Mansukh Mandaviya chuan World Health Organisation (WHO) chief scientist Soymya Swaminathan kawmin, Bharat Biotech siam Covaxin chu WHO pawmpuina pe turin a ngen.

Meeting-ah hian Covid-19 hripui leng mek chungchang pawh an sawidun bawk.

Covaxin hi Hyderabad-a hmunpui nei Bharat Biotech, ICMR leh National Institute of Virology, Pune-a mite ṭang kawpin'a an siam a ni.

Covaxin tana WHO pawmpuina dilin Bharat Biotech chuan July 19 khan Emergency Use Listing (EUL) hnuaia document pawimawh zawng zawngte chu a lo thehlut tawh a ni. Thla hmasa khan heng document endik hna hi thawh mek a nih thu Dr. Bharati Pravin Pawar chuan Rajya Sabha-ah a sawi.

Hungary thuneitute chuan Covaxin hnenah hian Good Manufacturing Practice (GMP) compliance certificate a lo pe tawh a, hei hi khawvel huapa hman tura pawmpuina tur kawngah pawh hmasawnna pawimawh tak a ni.

Swaminathan hian union minister of state (independent charge) Jitendra Singh pawh hmuin hri leng leh a kaihhnawih thil hrang hrangte an sawi dun bawk. Union Minister chuan ram chhunga hri leng dinhmun chu nitin prime minister Narendra Modi chuan a vil reng thu te, India ramah khawvel huapa Covid-19 vaccination drive chak leh lian ber kalpui mek anih thute a sawi.

Mass vaccination kaltlanga mipui tana pan awlsam leh lak mai theia remchanga a awm pawimawh zia Swaminathan chuan sawiin, vaccine hian variant hrang hrang lakah venghim thei lo mah se natna dang kaihhnawih thleng thei leh thihpui theihna lakah a veng thei a ni, a ti

Ram chhunga siamchhuah Covaxin hi Covid-19 Delta plus variant lakah hna a thawkṭha tih Indian Council of Medical Research (ICMR)-in kar hmasaa an zirchianna an tihchhuahah an lo sawi tawh a ni.