BJP-in J&K state puitlinga dah la hun loha ngai

Bharatiya Janata Party (BJP)-in Jammu and Kashmir chu state puitlinga dah let leh a la hun rih loha an ngaih thu a sawi.

BJP kaihhruai NDA sorkar hian kum 2019, August 5 khan J&K hnena special status pekna, Article 370 chu titawpin, state a nihna a ṭhiahsak a, Union territory pahnih - Jammu and Kashmir leh Ladakh-ah a ṭhen a ni.

J&K-a political party lian hrang hrangte chuan J&K chu state puitlinga dah let leh turin an nawr reng a, mahse hei hi BJP chuan a thlawp lo thung. J&K BJP thupuangtu chuan state-a dah let turin J&K dinhmun chu a la ṭha lo tih a sawi a, boruak ṭha nghah phawt a ṭul niin a sawi.

Hetih lai hian union minister hlui, Yashwant Sinha kaihhruai political action group, Rashtra Manch chuan prime minister Narendra Modi chu Independence Day-a thu a sawiah J&K statehood pek a nih leh thu hi sawi turin an phut. State-a dah let leh a nih hnuah inthlanna felfai tak buatsaih a nih tur thu pawh puang nghal tura an phut thu an sawi a ni.