Aug 20-ah eptu party-ten meeting nei dawn

Eptu party liante chuan August 20 hian eptu pawlte thawhhona tihchak dan ngaihtuahin virtual meeting an nei leh dawn a, he meeting hi Congress hruaitu Sonia Gandhi chuan a kaihhruai beisei a ni.

Meeting-ah hian Congress chief minister-te bakah, opposition chief minister dang- Shiv Sena hruaitu Uddhav Thackeray (Maharashtra), DMK hruaitu MK Stalin (Tamil Nadu) leh Trinamool Congress hruaitu Mamata Banerjee (West Bengal)-te an tel beisei a ni. National Congress Party (NCP) hotu pawh a tel rin a ni a, Rastriya Janata Dal (RJD) hotu Lalu Prasad Yadav leh Samajwadi Party (SP) leader Akhilesh Yadav pawh an tel dawn nia sawi a ni.

Parliament monsoon session neih mekah eptu party-te hi Pegasus scandal chungchang sawiho phutin House-ah an ṭangrual ṭha hle. Hemi chungchang sawiho phuta an nawrna avangin session-ah pawh hun tam tak rorel thei loin an awm a ni.

Congress Rajya Sabha MP Kapil Sibal chenna inah eptu party hruaitute hi an lo inhmukhawm tawh bawk a, kum 2024 Lok Sabha inthlanpui neihah BJP kaihhruai NDA paihthlak a nih theihna atana ṭanrual dan tur chungchangte an sawiho.