Ram pumah I-Day vawi 75-na lawm

India ram Independence Day vawi 75-na chu nimin khan ram pumah lawm a ni. A lawmna pui ber, New Delhi-a Red Fort-ah chuan prime minister Narendra Modi-a'n hnam puanzar pawtpharhin, thuchah a sawi.

PM Modi chuan sorkar hmalakna leh hlawhtlinna hrang hrang leh hmathlirte a sawi. India-in zalenna a hmuh aṭanga kum 100 tlin hma ngeiin India ram chu energy-a intodelh tura hma lak a tiam. Green hydrogen siamchhuahna leh thawnchhuahna hmunpuia India siamna tur, National Hydgrogen Mission siam a nih thu a puang.

I-Day-a PM Modi thusawi ṭum 8-na
Prime minister Narendra Modi hi nimin kha Independence Day lawmnaa thu a sawi ṭum riatna a ni.

PM hian nimin khan mintute 88-a rei thu a sawi, hetiang chen chiah hi kum 2015 khan a lo sawi tawh a ni.

Modi hain kum 2014 khan a ṭum khatna atan Independence Day thuchah hi sawiin, minute 65 chhung a sawi a ni. A thusawi rei loh ber ṭum chu kum 2017 kha niin, darkar khat tling lo chhungin thuchah a sawi zo hman a ni a, a sawi rei ber ṭum chu kum 2016 kha niin minute 94 chhung thuchah a sawi thung.

Kum 2015 thleng khan India Prime Minister zinga thusawi rei ber chu kum 1947-a Pandit Jawaharlal Nehru-an minute 72 chhung thu alo sawi tawh kha a ni.

Prime minister hlui Manmohan Singh khan Independence Day thuchah hi ṭum 10, kum 2013-2004 inkar khan sawiin, a sawi rei ber ṭum chuan minute 50 chhung a sawi a, a rei loh ber chu minute 32 a ni. Atal Bihari Vajpayee khan kum 2003 leh 2002 khan sawiin, minute 39 leh minute 25 chhung chauh a sawi bawk.

Nimina PM thusawi langsar zualte: -
- Tunah chuan thingtlang khaw 100% in kawngpui a neih tawh a, chhungkaw 100% in bank account neiin, Ayushman Bharat card chu beneficiary 100% in an nei a, Ujjwala gas connection pawh a dawngtu tur 100% in an nei tawh bawk.
- Ṭhalaite hna tur siamna atan te, local manufacturer-te khawvel huapa an inphochhuah leh infrastructure tihhmasawnna turin cheng vaibelchhe 100 ruahman a ni.
- National Education Policy 2020 chu retheihna umbona tur atana thil pawimawh tak a ni dawn a, hei hian naupang rethei zawk pawh an tualchhung ṭawng ngei hmanga zirna pein, professional-ah chher chhuah an ni thei dawn a ni.
- Sainik School chu hmeichhe naupangte tan pawh hawn a ni ang. Kawng engkimah hmeichhiate chuan chanvo ang khat neiin, an himna tur kan ngaihtuah zel a ṭul.
- Amrit Festival of Indepdencence pualin kar 75 chhung Vande Bharat rel 75 tlantir a ni dawn.
- Self-Help group-te thil siam chhuah chawilarna turin sorkar chuan e-commerce platform a siam ang.
- August 14 hi "Partition Horrors Remembrance Day" atan hman a ni tawh ang. Kan zalenna tura beitu kan hruaitute kan hre reng tur a ni.
- Northeast India-ah inkalpawhna lamah bung thar kan kai thuai dawn. Hmarchhak state tin khawpuite chu rel hmanga kalpawh vek an ni thuai dawn a, Act East Policy hnuaiah hmarchhakte chu Bangladesh, Myanmar leh South East Asia nen an inkalpawh thei dawn bawk a ni.
- Jan Ausadhi Yojana hnuaiah mi harsa zawkte chuan damdawi man tlawmin an lei thei tawh. Health & Wellness Centres 7,400 chuang din a ni tawh bawk a, block level tinah lab leh hospital siam tumin hma lak mek a ni.