Covid-19 kai thar 36,083 awm belh leh

India ramah Inrinni liam ta khan Covid-19 hri kai thar 38,083 an awm belh leh a, hri kai thar hian tlakhniam lam a pan leh ṭan tawh a ni. Hemi ni vek hian hri vanga thi 493 an awm tih Health Ministry chuan a tarlang.

Kerala state chu hri kai thar tamna ber ni chhunzawm zelin, Inrinni khan hri kai thar 19,451 awm belh lehin, chhimlam state hian ramchhunga hri kai thar zinga 50% chuang an nei a ni. Kerala hian test aṭanga hri kai zat, test positivity rate 13.97% a nie mek.

Ramchhunga hri tuar na ber Maharashtra chuan Inrinni khan hri kai thar 5,787 leh hri vanga thi 179 an neih belh leh a ni.

Vawiin aṭangin coronavirus vaccine dose bikima la tawh emaw negative RT-PCR test report nei emaw te chauh Punjab-ah luh phalsak an ni dawn tih chief minister Amarinder Singh chuan a sawi. State chhungah hri kai nuai ruk dawn an awm tawh bawk a ni.

Hri leng thawh hnihna tuar nasa ber zinga mi, Delhi-ah Covid-19 kai thar hi Inrinni khan mi 50 awmin hri vanga thi pakhat a awm bawk. Delhi-ah hian hri kai hmuhchhuah tawh 14,37,038 awmin, hri kai mek 478 an awm.

Assam-ah chuan hri kaihhnawih vanga thi 11 an neih belh leh a, hri vanga thi 5,482 an awm tawh tih National Health Mission bulletin chuan a tarlang. Assam-ah hian coronavirus kai hmuhchhuah thar 755 awm belh lehin, hri kai hmuhchhuah tawh hi mi 5,79,488 an tling tawh.

India ramah Inrinni khan Covid-19 vaccine nuai 52 semchhuah leh niin, ram pumah vaccine sem chhuah tawh zat hi dose vaibelchhe 54.38 a tling tawh a ni.

Nitina hri kai zat, daily positivity rate chu ni 20 chhung 3% hnuai lamah awm tawhin, Inrinni khan 2%-ah a awm. Hri kai hmuhchhuah tawh aṭanga hri kai zat, fatalility rate hi 1.20% ni mek bawkin, March 2020 hnua a hniam ber ṭum a ni. Covid-19 recovery rate chu 97.46% a ni mek tih Union Health Ministry chuan a tarlang.

Vaccine dose khatna la tawh zinga mi nuai 2.6 emaw 0.048% emaw chuan Covid-19 an positive leh tawh tih Health Ministry chuan a tarlang. India rama Covid-19 vaccine pathum hman mek - Covishield, Covaxin leh Sputnik V-te chuan hri tha laka mi a ven theihna kawnga an hnathawh chu a intluktlang nia sawi a ni.