ED-in Nirav Modi-a in an dap

Enforcement Directorate (ED) chuan nimin khan Mumbai-a tlereuh zuartu lian, Nirav Modi-a in leh dawr 10 an dap. ED hian Nilaini-a Punjab National Bank (PNB) Mumbai branch pakhat aṭanga cheng vaibelchhe 11,300 thawnkual a nih kaihhnawihah Modi leh midangte lakah thubuai a ziaklut nghal bawk a ni.

Ramchhunga bank lian zinga mi, PNB hian kar hmasa khan Nirav Modi leh a thurualpuite chuan cheng vaibelchhe 280 chuangin bank an bum nia saiwin CBI-ah thubuai an lo thehlut tawh bawk. Hemi chungchang leh Nilaini-a bank aṭanga dik lo taka sum thawnkual a nih dan hi inzawmna a nei em tih chhui zui nghal a ni bawk.

PNB hian complaint a thehluhah diamond firm pathum–Diamonds R US, Solar Exports leh Stellar Diamonds-te hming tarlangin, January 16 khan rampawn lama supplier-te sum pek a ngai nia sawiin buyers' credit an dil tih a sawi. Nirav Modi, a nupui Ami, a unaupa Nishal leh Mehul Choksi-te hi Diamonds R US, Solar Exports leh Stellar Diamonds-ah hian partner an ni a, ram pawn lam Hong Kong, Dubai leh New York-ah te pawh dawr an nei a ni.

Nilaini khan PNB hian billionaire Nirav Modi-an dik lo taka Mumbai branch aṭanga letters of undertaking (LoU) a neih hmangin bank kaltlanga cheng vaibelchhe 11,360 a thawn kualna hmuhchhuah a nih thu a sawi a ni. Hemi chungchang hi CBI kutah hlan niin, official 10 suspend an ni tawh bawk.

PNB bakah Axiz Bank, Allahabd Bank leh Union Bank of India-te chuan LoU diklo a hman behchhan hian Nirav Modi hi loan pawh an lo pe tawh niin an sawi bawk. He thil thleng chungchangah hian private bank chauh ni lo, public leh foreign bank-te pawh an inhnamhnawih nia a lan thu CBI chuan a sawi.

Punjab bank-a dik lo taka thiltih hmuhchhuah a nih hnu hian, ramchhunga state-run lender lian ber dawttu, Punjab National Bank share hi 9.8% in a tlahniam hman tawh a ni.