Thla 5 hnuah kar khata hri kai hniam ber ṭum thleng

India ramah March thla laihawl hnua kartina hri kai thar, weekly Covid-19 case hniam ber ṭum chu kar liam ta khan thlengin, August 9-15 chhunga hri kai thar chu nuai 2.6 hnuailamah awmin, a kar hmasa liamta ai khan 6.7% in a tla hniam bawk.

Hri kai tlahniam mah se kar ruk chhung chu ramchhunga hri kai hmuhchhuah hi nuai 2.5 - nuai 3 inkarah a la awm a ni. Hemi chhung hian ramchhung hmun ṭhenkhatah chuan hri kai hi an la pung nasa hle a, Kerala chu hri kai hmuhchhuah tamna ber niin, hmarchhak bialah hri kai an la pung bawk. Karnataka, Tamil Nadu leh tunhnai khan Himachal Pradesh-ah te hri kai hmuhchhuah thar hi an pung ve leh deuh.

Hri leng hian Maharashtra chu a kiansan mawh hle a, hri kai thar zat hi an tlahniam hleithei lo. Andhra Pradesh leh Odisha pawhin nitin hri kai thar 1,000 chuang an la nei ziah bawk.

Kar liam ta chhung khan India-ah hri kai thar 2,55,819 awmin, March 8-14 chhunga hri kai mi 1,55,912 an awm hnua an hmuhchhuah tlem ber ṭum a ni. Ramchhunga kartina hmuhchhuah tam ber kar chu May 3-9 niin, hemi chhung hian hri kai nuai 27.4 chuang hmuh chhuah an awm.

Hemi hnu hian hri kai thar hi tlahniam ṭanin, July 5-11 kar aṭang khan kar khat chhunga hri kai hmuh chhuah pawh nuai thum hnuai lamah a tla thla hman. Tlakhniam lam a pan zel hnuah, July 26-August 1 chhung khan hri kai hi 7.5% ah a sang chho leh a ni.

Hetihlai hian hri vanga thi zat chuan tlakhniam lam a pan zel. Kar hmasa khan thi 3,334 an awm a, a kar hmasa leha thi 3,540 aiin 5.8% in an tlem zawk.

Pathianni khan Covid-19 kai thar 33,500 awmin, ni ruk chhunga a tlem ber ni a ni. Hemi ni vek hian hri vanga thi mi 421 an awm bawk.

Health minister-in Kerala a tlawh
Union health minister Mansukh Mandaviya chuan nimin khan Covid-19 hri darh zual lehna, Kerala state a tlawh a, state chhung dinhmunte a sawipui.

Mandaviya leh Kerala chief minister Pinarayi Vijayan-te chuan kar hnih liam ta khan an state-a coronavirus darh chungchang an lo sawidun tawh bawk. Hri darh zel tur venna tura hmalakna awmze nei ngaihtuah turin CM hi ngenin, Health Minister chuan state sorkar nena thawhdunna ṭha an neih a pawimawh thute a sawi a ni.

Kerala-ah hian Covid-19 kai maktaduai 3.67 leh thihpui 18,601 an awm tawh. Pathianni khan hri kai thar 18,582 awmin, Covid-19 vangin mi 102 an thi bawk. Hemi ni vek hian hri kai dama chhuahtir 21,000 an awm a, dama chhuahtir tawh hi mi 3,492,367 an awm tawh a, hri kai mek 1,78,630 an la awm tih health department bulletin chuan a tarlang. Pathianni khan Covid-19 sample 1,22,970 test leh niin, test aṭanga hri kai zat, test positivity rate chu 15.11% a ni.