SC-in Cauvery lui tui sem dan tur rel

Supreme Court chuan nimin khan Karnataka leh Tamil Nadu state-in Cauvery lui tui an inchuh chungchanga lui tui insem dan tur a rel sak a, Cauvery Management Board din turin a ti bawk.

Supreme Court chuan Bengaluru-a tui lama harsatna an tawh mek avangin Tamil Nadu hnena Cauvery lui tui pek ṭhin chu a tihtlem sak a, Karnataka chuan a hma aiin a chang tam thei tawh dawn a ni. Court chuan Karnataka tana lui tui chan tir tam a nih chhan chu Bengaluru khawpuiin tui lama harsatna a tawh vang te, tui thianghlim a mamawh vangte a nih thu a sawi.

Karnataka hian Tamil Nadu hnena Cauvery lui tui thousand million cubic feet 192 a pek ṭhin chu TMC 177.25-ah titlemsak a ni dawn a, Kerala chan tur TMC 30 leh Puducherry chan tur TMC 7 erawh chu tihdanglam a ni lo thung.

Cauvery lui tui insem dan chungchang hi Supreme Court judge pathum, Cheif Justice Dipak Misra kaihhruai special bench chuan nimin khan a ngaihtuah a, he lui hi state pakhat ta bil a ni lo a, hei vang hian a chhehvela state-te chuan he lui tui hian insem tlang tur a ni, a ti.

Kum 2007 khan Cauvery tribunal chuan Tamil Nadu tan hian lui tui hi TMC 192 pek turin a lo ti tawh a, mashe Supreme Court chuan Tamil Nadu hian a ram chhunga tui TMC 20 vel chu a hmang ṭangkai lo a, hei vang hian a mamawh tana pek dan ngaihtuah hi a ngai a ni, a ti.

Tamil Nadu-a rorellai, AIADMK MP Navaneethakrishnan chuan Supreme Court thurel dan chu an lawm lo hle tih sawiin, Tamil Nadu sorkar chuan aṭul angin hma a la zui nghal dawn nin a sawi. State chhunga political party hrang hrang pawhin Supreme Court thurel dan chu an lawm loh thu an sawi a, hemi chungchang ngaihtuaha all-party meeting ko turin state sorkar chu an phut bawk.

Cauvery lui tui hi in tur lakna atan bakah loneitute hman tura lak a nih ṭhin avangin Tamil Nadu leh Karnataka hi he lui tui inchuh hian hun rei tak an lo buai tawh a ni. State pahnihte inkara buaina hi kum 2007 khan Cauvery Water Disputes Tribunal chuan chinfel sakin, Karanataka hnenah Tamil Nadu tan lui tui hi TMC 192 pechhuak ṭhin turin a ti a ni. Tribunal-in thutlukna a siam danah hian lungawi loin Tamil Nadu, Karnataka leh Kerala-te chuan an appeal an ni.