CBI-in Interpol puihna dil

Central Bureau of Investigation (CBI) chuan Punjab National Bank (PNB)-a dik lo taka sum tam tham tak thawnkual chungchanga inhnamhnawih, billionaire jewellery designer Nirav Modi-a awmna chin hriat a nih theih nan Interpol puihna a dil.

PNB-a thil dik lo thleng haichhuah a nih hma, January chawlhkar hmasa ber khan Nirav Modi leh a chhungte hian India ram an chhuahsan niin CBI official chuan a sawi. Hei vang hian a awmna chin hriat a nih theihna tura Diffusion Notice tichhuak turin Interpol hi a ngen a ni.

Interpol chuan hemi chungchang hi a website-ah tarlangin, diffusion notice hi police-ten an chhui mek awmna chin hriat nan leh man tura ngenna atan hman a nih thu a sawi. Diffusion notice hi Interpol member-te member dangte ramah direct-in an tichhuak thei a ni.

Kum 46 mi, Nivrav Modi hi PNB-a dik lo taka cheng vaibelchhe 11,400 thawnkual chungchangah inhnamhnawiha puh a ni. Modi hian January 1 khan India a chhuahsan tawh a, hemi ni vek hian a unaupa, Belgian citizen neitu Nishal chuan India a chhuahsan ve bawk. Modi-a nupui, US citizen Ami chuan January 6 khan India a chhuahsan thung a, Modi-a pu leh a partner Mehul Choski chuan January 4 khan India a chhuahsan bawk a ni.

Lunghlu lama sumdawng lian, Modi hi kum 2013 aṭang khan India rama mi hausa leh thiltithei list siamah a tel ziah a ni. January 31 khan PNB bum a, cheng vaibelchhe 280 lachhuakah puh a nihnaah Modi leh a nupui, a unaupa leh Choksi-te hi CBI chuan thubuai a lo siamsak tawh bawk.