Candidate leh an chhungte thil neih puanzar tur thlawp

Political party hrang hrangte chuan Supreme Court-in inthlana chuh tum, candidate-ten anmahni bakah, an chhungkaw member-te thil neih leh sum lakluhnate an tarlang tel tur tia a rel chu ṭha an tih thu nimin khan an sawi a, hei hi electoral system thenfainna tur pawimawh tak pakhat a ni, an ti.

Justice J Chelameswar leh S Abdul Nazeer awmna bench chuan Lucknow-a NGO Lok Prahari public interest litigation (PIL) thehluh a ngaihtuahnaah nimin khan he thutlukna hi a siam a ni. NGO chuan court hnenah hian candidate-te hnenah hian an thil neih zat chauh ni lo, an sum lakluhna hnarte tarlan tel tir vek turin a ngen a ni.

Eptu party–Congress, Samajwadi Party leh CPI(M) chuancourt thutlukna hi ṭha an tih thu sawiin, electoral politics rinngam zawk a siam phah dawn a ni, an ti.

Tuna dan hman mekah chuan candidate-te hian Form 26-ah anmahni bakah an nupui/pasal, leh an fate pathum thil neih zat tarlan tur a ni a, mahse an sum lakluhna hi tarlan tel a ngai lo thung. Hei hi Supreme Court chuan siamṭhain, an sum lakluhna, a source hi tarlang tel tawh turin a ti a ni.

Congress hruaitu Manish Tewari chuan court thutlukna siam chu lawmawm a tih thu sawiin, a hma chuan income tax return hi a duplicate siamin Election Commission-ah an thehlut thei a, mahse he ruahmanna thar hnuaiah hian inthlanna thianghlim zawkin a kalpui theih dawn a ni, a ti. CPI(M) pulitburo member Md Salim pawhin an party chuan court thutlukna siam hi an thlawp thu a sawi a, Bihar-a rorellai Janata Dal (United) chuan dan thar siam hian inthlana black money hman ṭhin pawh a veng thei dawn niin a sawi. JD(U) hotu Sanjay Jha chuan inthlanna felfai leh langtlang zawk kalpuina tura hmalakna chu an party chuan a thlawp zel dawn tih a sawi bawk.