Kar khat cham turin Canada PM a rawn zin

Canada Prime Minister Justin Trudeau chu kar khat cham turin Inrinni khan New Delhi a rawn thleng a, a nupui Sophie Gregoire leh a fate pathum–Xavier (10), Ella-Grace (9) leh Hadrien (3)-te a rawn hruai.

Canada PM hi Prime Minister Narendra Modi-a sawmna anga rawn zin an ni a, a chhungte bakah Foreign Minister Chrystia Freeland, Science and Economic Development Minister Navdeep Bains, Defence Minister Harjit Singh Sajjan, Science and Sports Minister Kirsty Duncan leh Infrastructure Minister Amarjeet Sohi-ten an rawn ṭawiawm a ni.

Kum 46 mi, Justin Trudeau hi Canada PM ni thei naupang ber dawttu a ni a, PM hlui Pierre Trudeau-a fapa a ni. India pana an rawn chhuah hma hian Trudeau chuan India ram a kal tur chu a phur thu leh, ram pahnih mipuiten inzawmna nghet leh thuk zawk an neih theihna tur chu an ngaihven ber tur a nih thu a sawi.

Indira Gandhi International Airport-ah Canada PM leh a ṭhuihruaite hi Minister of State for Agriculture Gajendra Singh leh Canada-a Indian Ambassador Vikas Swarup-ten an lo hmuak a ni. Trudeau hian PM a nih hnua India a tlawhna hmasa ber a ni bawk.

Canada PM leh a chhungte hian nimin khan Agra-ah kalin Taj Mahal an tlawh a, a cham chhung hian Delhi bakah Ahmedabad, Mumbai leh Amitsar-te a tlawh bawk ang. February 23 hian Prime Minister Narendra Modi nen an inkawm dawn a ni. Ram pahnih hruaitute inkawmnaah hian trade, defence, civil nuclear cooperation, space, climate change, energy leh education chungchangte an sawidun dawn a ni.

Vawiin hian Trudeau hi Gujarat-ah kalin, Mahatma Gandhi chenna ṭhin Sabarmati Ashrama tlawh ang. Akshardham Temple pawh tlawh nghalin, Indian Institute of Management-ah zirlaite nen "Education and Investment Opportunities" tih chungchang an sawiho dawn bawk.

Canada PM hi Mumbai-a trade, investment leh job creation chungchang sawihonaah pawh a tel dawn a, cinema lama ram pahnihte thawhdun theihna tur ngaihtuahin Indian Film industry aiawhte pawh a hmu bawk ang.