Bank official manten thuneitute thawhpui ṭha lo

Punjab National Bank,Mumbai branch aṭanga dik lo taka sum tam tham tak thawnchhuah a nih chungchang chhui meknaah, he thila inhnamhnawiha puha bank official mante chuan thuneitute an thawhpui ṭha duh lo niin Central Bureau of Investigation (CBI) official-te chuan an sawi.

PNB chuan February 14 khan an bank hnuaia Mumbai branch pakhat aṭangin dik lo takin cheng vaibelchhe 11,400 thawnchhuah a ni tih an hmuchhuak niin a sawi a ni. CBI hnenah complaint thehlutin, bank chuan dik lo taka thiltitu billionaire jeweller Nirav Modi-a firm leh a thawhpuite chuan bank guarantee hmuh nan bank official ṭhenkhat an thawhpui niin a sawi a ni. Hemi hnu hian he thila inhnamhnawiha puh bank official eng emaw zat man an ni.

CBI chuan kar kalta Inrinni khan bank official an mante hi thu an zawtfiah a, mahse an mi mante hian thil awmdan an sawi ṭha duh lo niin a sawi. CBI chuan billionaire Nirav Modi leh Gitanjali Gems Ltd managing director Mehul Choksi bakah, bank staff member leh pawn lam mi, he thila inhnamhnawihte chu chhui zui zel an nih thu a sawi.

Bank official mante hian CBI hnenah, ram pawn lama sum thawnchhuahna tura Nirav Modi-a company hnena Letter of Undertaking (LoU) pekna turah hian a sum tam dan azirin an chawi tir tur zat an siam vek ang a, LoU pekchhuah manah sum an lakte hi he thil buaipuitu PNB-a thawktute hnenah sem an ni tih a sawi.

LoU dik lo hi PNB Mumbai branch aṭangin Nirav Modi leh midangte tan hian Allahabad Bank leh Axis Bank, Hong Kong branch-ah cheng vaibelchhe 280.7 pek an nih theihnan pek a ni tih hriat a ni bawk. CBI hian Inrinni khan Nirav Modi Group of Firms-a Authorised Signatory Hemant Bhat leh single window operator (SWO) Manoj Kharat-te an man bawk a ni.