Nikhatah Covid vaccine dose nuai 88.13 semchhuak

India ramah Thawhṭanni khan Covid-19 vaccine dose nuai 88.13 sem chhuah a ni a, hei hi ni khat chhunga Covid vaccine semchhuah tam ber ṭum a nih thu Union Health Ministry chuan nimin khan a puang.

Nimin zing dar 7 thleng khan ramchhungah session 62,12,108 kaltlangin vaccine dose 55,47,30,609 semchhuah a ni tawh a ni.

Health Ministry chuan vaccine dose vaibelchhe 56.81 chu state leh UT hnenah semchhuah tawh niin, dose 1,09,32,960 dang pawh pek leh turin buaipui mek a ni, a ti.

A hmaa ni khata vaccine pek chhuah tam ber record chu June 21 kha niin, vaccine pek chhuah runpui tha thara kalpui leh ṭan ni kha a ni. Hemi ni hian vaccine hi dose nuai 86 sem chhuah a ni.

Sorkar laipui data-in a tarlan danin, ram pumah health worker maktaduai 8.1 velin vaccine dose bikimin an la tawh. Kumin January16-a vaccine pek chhuah ṭan a nih khan health worker-te hi pek hmasak an ni a, February 2 khan frontline worker-te pek ṭan an ni ve leh bawk. Frontline worker zingah vaccine dose kima la tawh hi maktaduai 12.2 an awm tawh.

Kum 18-45 inkar, vaccine dose hnihna la tawh hi maktaduai 16 vel awmin, kum 45 chung lam zingah maktaduai 80 velin vaccine dose kimin an la tawh bawk a ni.

Vaccine supply leh a pek chhuah dan ruahmanna mumal tak a awm chhoh zel avangin, nitina vaccine pek zat pawh an pung chho zel tih official chuan an sawi. Ni khata vaccine pek zat pawh hi hun rei loteah a pun zel an beisei tih an sawi.

Thla 5 chhunga hri kai tlem ber ni thleng
Thawhṭanni khan Covid-19 hri kai thar mi 25,166 awmin, thla nga chhunga ni khata hri kai hmuhchhuah tlem ber ni a ni.

Ram chhungah hri lengin ziaawm lam a pan chho zel a, hri kai enkawl dam pawh pung zelin enkawl dam tawh, recovery rate hi 97.51% a ni tawh a, hei hi March thla hnua a san ber ṭum a ni.

Hri kai mek, active case pawh Thawhṭanni khan 3,69,846-ah tla thlain, ni 146 chhunga a tlem ber ṭum a ni. Active case hi hri kai hmuhchhuah tawh aṭangin 1.15% a ni tawh tih union health ministry data chuan a tarlang.

Kar khata hri kai hmuh chhuah, weekly positivity rate pawh 1.98% niin, ni 53 chhung chu 3% hnuai lam a ni tawh bawk.

Covid-19 hri thihpui mi 4,32,079 awm tawhin, hei hi hri kai tawh aṭanga 1.34% an ni.