Afghanistan aṭangin India palai leh official-te hruai haw

Taliban-ten Afghanistan ram thuneihna a lak hnuah, ram hrang hrangte chuan Afghanistan-a an mi leh sa awmte an hruai haw mek. India pawhin nimin khan Kabul-a Indian ambassador Rudrendra Tandon leh embassy staff-te chu sipai thlawhtheihna hmangin an hruai haw.

Indian Air Force (IAF) thlawhtheihna, C-17 aircraft hmang ambassador leh staff-te hi hruai haw niin, Gujarat-a Jamnagar-ah chawhma dar 11:15 khan phurh thlen a ni.

External affairs ministry thupuangtu, Arindam Bagchi chuan Kabul khawpui dinhmun te thlirin, ambassador leh Indian staff-te hruai haw hi rel an ni tih a sawi. Thlawhtheihna hmang hian ambassador Tandon, official leh security mi leh sa, mi 120 chuang hruai haw an ni. Thawhṭanni khan C-17 aircraft hmang vêk hian Kabul aṭangin India mi 40 vel chu hruai haw an lo ni tawh bawk.

E-emergency visa siam
Afghanistan ramchhung buaina thleng vang leh, Kabul-a India embassy khar a nih avangin, sorkar laipui chuan Afghanistan aṭanga India rama lut duhte electronic visa thar, ‘e-Emergency X-Misc Visa’ a siam.

E-visa siam thar hnuaiah hian Afghan mi tupawhin sakhaw behchhan kher loin India rama luh hi an dil thei dawn a ni. An dilna hi Delhi-ah enfiah niin, thla ruk chhunga India rama awm phalna pek phawt a ni ang.