Covid vanga thi chhungte ṭanpuina pek dan duang turin Supreme Court-in sorkar laipui hun a pek belh leh

Supreme Court chuan Covid-19 vanga an chenpui chantate hnena zangnadawmna pek an nih dan tur chungchanga kaihhruaina siam turin, Thawhaṭanni khan sorkar laipui chu kar li dang hun a pek belh leh.

Sorkar laipui chuan kaihhruaina an siam thar chu an peihfel ṭep tawh thu leh zangnadawmna an peihfela an pekchhuah hma hian zirchianna thuk zawk neih nan hun an mamawh belh dawn tih SC an hrilh a, hei vang hian court chuan hun hi a pek belh leh ta a ni.

Hemi chungchang an ngaihtuahnaah, justice D Y Chandrachud leh M R Shah awmna bench chuan, June 30-a thupek an lo chhuah chu engchen nge an zawm tawh tih additional solicitor general Aishwarya Bhati hnenah a zawt. Bhati-i chuan Court thupek chhuah aṭanga an hmalakna kimchangte chu kar hnih chhungin affidavit kimchang thehluh hman a tum tih a hrilh.

SC hian June 30 khan National Disaster Management Authority (NDMA) hnenah, hri vanga chhungte chante hnena chhawmdawlna pek dan kaihhruaina hi kar ruk chhunga siam turin thurawn pe turin a lo ti tawh a ni. Thupek a tihchhuahah hian SC chuan death certificate/official document pekchhuah leh siamṭhat chungchangah inkaihhruai dan kawng mumal tak duang a, an thihchhan chiang taka tarlang tur leh welfare scheme hamṭhatna an dawn theih nan Covid-19 vangin an thi ngei tih finfiahna an neih a ngai a ni, tih a sawi. Hei bakah hian sorkar laipui chu Fiannce Commission rawtna anga, Covid hri vanga thite insurance cover siam tura hma la turin a ti bawk.