Nirav Modi-a top official thu zawtfiah dawn

Punjab National Bank (PNB) aṭanga cheng vaibelchhe 11,400 thawnchhuah a nih chungchang chhuina kal zelah, Central Bureau of Investigation (CBI) chuan he thila mawhphurtu bera puh, billionaire Nirav Modi-a Chief Financial Officer, Ravi Gupta chu thu zawhfiah turin a ko.

Pathianni khan CBI chuan Nirav-a company, Firestar International Company-a senior official Vipul Ambani leh official dangte chu thu an lo zawtfiah tawh bawk.

CBI chuan Nirav Modi, a pu Mehul Choksi leh midangte puihna tura bank officer-ten Letters of Undertaking (LoU) lem an siam chungchangah hian PNB official 11 chu thu an lo zawt tawh bawk a ni. Dik lo taka sum tam tham tak thawnchhuahna, Mumbai-a PNB Brady House branch chu CBI chuan a kharsak tawh bawk.

Inrinni khan agency hian PNB Deputy Manager hlui Gokulnath Shetty, single window operator Manoj Kharat leh group authorised signatory Hemand Bhat-te chu guarantee lem pekchhuak chungchanga an inhnamhnawih avangin an man tawh bawk a ni.

Gokulnath Shetty hian CBI hnenah LoU pekchhuahna, SWIFT software-a Level-5 password chu a pe hman thu sawiin, password hi bank-a thawktute bakah Nirav Modi-a company director-te pawh a hrilh niin a sawi. Shetty-a hian LoU eng emaw zat a pekchhuah hi bank dangahte pein, hemi hmang hian jewellery company hian loan a la thei a ni. He lehkha hi ram pawn lama bank branch-ahte pawh thawn a ni. CBI chuan kum sarih kalta chhung khan LoU lem hi 150 vel zet pekchhuah niin an sawi.

PNB chuan kum sarih chhung manager hlui leh a thurualpuiin hetiang zat LoU an pekchhuah, hriatchhuah loha a awm theih dan chu an chhui mek tih an sawi. Indian banking chanchina inbumna lian tham ber thleng chungchang hun rei tak hriat chhuah loha a awm thei hian mak tih a hlawh hle.

Bank-a dik lo taka sum thawnkual a nih dan hi January thla khan hriatchhuah a ni. Hemi ṭum hian Nirav Modi leh Mehul Choksi-te huan PNB Brady House branch-ah hian supplier-te hnena sum pekna turin LoU thar an dil a, bank hian an record aṭangin Modi-te hnenah hian hetiang guarantee pek tawhna chhinchhiah engmah a awm lo tih an hrechhuak ta a ni.