CBI-in Rotomac Pen neitu chenna in dap

CBI chuan Rotomac Pen promoter Vikram Kothari chu nimin khan thubuai siamsakin Kanpur-a a in leh office pawh an dapsak bawk.

Vikram Kothari hian bank panga aṭanga a loan lak, cheng vaibelchhe 800 a rulh loh avangin a in leh office-te hi dapsak a ni a, amah bakah a nupui leh fapa pawh thu zawhfiah an ni bawk. CBI chuan Bank of Baroda-in complaint a thehlut behchhanin Kothari lakah hian FIR a ziaklut tawh bawk a ni.

Kothari hi bank loan tam tham tak a bat avangin a tlanchhia nia sawi a ni a, mahse Kothari chuan hei hi thu dik lo a nih thu leh, Kanpur-ah a la awm reng thu a sawi a, a loan pukna bank aiawhte nen pawh an inbiak thu a sawi.

Kanpur-a hmunpui nei, Rotomac Pen neitu hian state sorkar hnuaia bank panga aṭangin cheng vaibelchhe 800 chuang loan lain, a rul thei lo a ni. A loan lakna bank zingah hian Allahabad Bank, Bank of India leh Union Bank of India-te pawh an tel. Kum 2017 khan Bank of Baroda chuan a company chu loan rul duh loah a lo puang tawh a, mahse company hian Allahabad high court-ah thlenin, court chuan company hian bank-ah asset cheng vaibelchhe 300 chuang hu a nei nia sawiin, company an puhna chu a dik lo niin alo sawi sak tawh a ni.