Nirav Modi-an a buai chhanah PNB a puh

Punjab National Bank-a cheng vaibelhhe 11,300 tihchingpennaa mawhphurtua puha Central Bureau of Investigation (CBI) in a chhui mek, billionaire Nirav Modi chuan a buaina chhan berah PNB chu a puh a, bank ho thiltih avang hian a leiba a rulh theihna tur kawng pawh kharsak a nih phah niin a sawi.

Modi hian February 15-16 khan PNB management-ah lehkha thawnin, a company-in bank-a a bat chu bank-in a sawi anga tam ni loin, cheng vaibelchhe 5,000 pawh a tling lo tih a sawi a ni.

Punjab National Bank hnena lehkha a thawnah, Modi chuan PNB-in tunhnaia media lama an bank-a thil thleng nasa tak an puanzar avangin a in leh dawrte dap a ni a, hei vang hian

Firestar International leh Firestar Diamond International-te pawhin hna thawk thei loin, an company-in bank leiba a rulhna tura a hnathawhte a tihbuai phah a ni, a ti.

PNB thiltih chuan a company hming leh a sumdawnna thlengin a tihchhiat sak niin a puh bawk. Ramchhunga a sumdawnna chu cheng vaibelchhe 6,500 hu a ni tih sawiin, Modi chuan hei hian bank-a a leiba tam tak a rul thei dawn a, mahse a bank account leh a thil neih dangte khawih chet theih loha hreksak a nih avangin engmah a tih theih loh niin a sawi. PNB thiltih avanga a thil neihte hreksak a nih avangin a firm-a thawk, mi 2,200-te hlawh chu peksak turin bank chu a ti bawk.

Sorkar laipui chuan Reserve Bank of India (RBI) hnenah lehkha thawnin, Nirav Modi leh a pu Mehul Choksi-te company tana dik lo taka letters of undertaking (LoU) pekchhuah a nih dan hi a hmain rinhlelhna a lo nei em tihte a zawt a ni.

Nirav Modi-a ukil, VijayAggarwal chuan PNB-a sum tam tham tak tihchingpen a nih chungchanga Modi-a puhna chu finfiahna engmah a awm lo niin a sawi a, he thubuai hi 2G scam leh Bofors chungchang ang mai khan a zuzi ral mai dawn niin a sawi. Agency-te chuan media lamah thawm nei na viau mah se, court-ah finfiahna pek tur an nei lo niin a sawi. Hei vang hian Nivav Modi pawh hian thiam a chang ngei dawn a ni, a ti.

Hetihh lai hian Income Tax department chuan financial year liamtaah khan Nirav Modi group hian dik lo takin special economic zone aṭanga ram pawn lama thawnchhuah tur, lunghlu cheng vaibelchhe 1,216 hu chu dan loin ram chhungah a pawisa faiin a hralh niin a tarlang.

Director-General of Income Tax (Investigations) chuan kum 2016-17 chhung khan Modi group hian ram pawn aṭanga lakluh, lunghlu ṭha mi a sawngbawl a, thawnchhuah leh tura tih chu ramchhunga bazarah hlep sang takin a hralh a, hemi aiah hian lunghlu quality hniam zawk chu ram pawn lama a thawhpui unite-te hnenah a pek zawk niin a sawi.