CBI-in PNB General Manager-rank officer man

Central Bureau of Investigation (CBI) chuan Punjab National Bank (PNB)-a sum tam tham tak tihchingpen a nih chungchang a chhuina kal zelah, nimin khan bank senior official a man belh leh.

CBI chuan kum 2009, August–May, 2011 inkara Mumbai-a PNB Brady House branch hotu ni ṭhin, Rajesh Jindal chu man a nih thu sawiin, he buaina kaihhnawihah hian bank official paruk an man tawh tih a sawi.

PNB Brady House branch aṭang hian dan loin sum tam tham tak thawnkual a ni tih tunhnaiah puanzar a ni a, mahse he sum thawnkualnaa inhnamhnawiha puh firm neitu, Nivav Modi chuan thiam lohna an nei lo niin a insawi thung.

PNB chuan kum 2011 aṭang khan, lunghlu lama sumdawng lian Nirav Modi leh a pu, Mehul Choksi nena inzawmna nei firm-te chuan ram pawn lam bank aṭanga sum tam tak an puk theihna turin Brady House branch aṭang hian dik lo takin letters of undertaking (LoU) an lo la ṭhin niin a sawi. CBI thupuangtu chuan Brady House branch-a hotu a nih laiin Jindal hian Nivav Modi group firm ho tan hian bithliah chin pawh nei loin LoU hi a pechhuak ṭhin a ni, a ti. Jindal hi tunah New Delhi-a bank head office-ah general manager ni mek a ni a, bank-a sum lam buaina kaihhnawiha CBI in official a man tawh zingah dinhmun sang ber a ni.

Nivav Modi leh a chhungte hian January thla tir lam khan India ram an lo chhuahsan tawh a ni. Modi hi ram pawn lamah hian a tlanchhia nia sawi a nih laiin, a ukil Vijay Aggarwal chuan Modi hian sumdawnna thil vangin India hi a chhuahsan niin a sawi. Ram pawn lam thlenga sumdawnna nei a nih avangin a zin chhuak fo a, a chhungte zinga ṭhenkhat pawh ramdang mi niin, ram pawn lamah hun tam zawk an hmang a ni, a ti.

Ajjarawal chuan PNB hian Modi-a firm-ten commercial transaction an siam chu thil dik lo niin a puhsak a, hei vang hian Modi-a in leh office-te dapsak a nih bakah,a thil neihte pawh khawih chet theih loha hreksak a nih phah a ni, tiin a sawi.

PNB hian Nivav Modi, a chhungkaw member-te leh Gitanjali Gems neitu Mehul Choksi lakah cheng vaibelchhe 11,400 leh cheng vaibelchhe 280 hmanga buma puhna complaint a lo thehlut tawh a ni. Mahse Aggarwal chuan he thil hi bank hriatpui veka tih a ni a, bank pawh hian a commission cheng tam tak a la a ni, a ti.