Delhi Police-ten AAP MLA man

Delhi Chief secretary Anshu Prakash-an Aam Aadmi Party (AAP) MLA-ten Chief Minister Arvind Kejriwal-a chenna inah kut an thlak nia a sawi avangin Thawhlehni khan police-ten AAP MLA Prakash Jarwal an man.

Chief Secretary Prakash hian Thawhṭanni zana CM chenna ina Aadhhar kaihhnawih thil chungchanga meeting an neihah, AAP MLA Amantullah Khan leh midangten kut an thlak niin a sawi a, hei vang hian Delhi Police-te chuan Khan leh midangte lakah hian FIR an ziaklut tawh a ni.

Hetih lai hian AAP MLA ṭhenkhat chuan chief secretary hian chi inthliarna lam hawi ṭawngkam mawi lo tak a chhakchhuak niin an sawi thung a, hei vang hian Delhi Police leh National Commission for Scheduled Castes-ah complaint an thehlut ve bawk.

AAP Delhi unit thupuangtu Saurabh Bharadwaj chuan MLA Jarwal hi a laka dik lo taka complaint thehluh behchhana man a ni thu sawiin, Delhi Police-te chuan MLA an puhna hi finfiahna pawh an nei lo niin a sawi. Hetih lai hian IAS officer-ten Secretariat-a minister kut an thlak lai video pawh a awm a, minister-in complaint a thehlut chungin tumah man an lo ni lo a ni,a ti. Chief Secretary Prakash hi CM chenna-inah kut thlak nia sawi a nih vang hian, Thawhlehni zing khan Delhi Environment Minister Imran Hussain chu Delhi Secretariat chhungah official leh staff-ten hualin kut an thlak zui ve leh nia sawi a ni.